На ва макьалалуву Совет Союзрал кIийла Виричу АхIмад-Хан Султаннул дяъвилул ва мунияр махъсса шиннардий дурмуния буслай бакъара. Чивчунни, бувсунни миннуя СМИ-дал.

Бюхттулсса Ххувшаврил байрандалул гьантрай ттун ччан бивкIунни чан-кьансса бусан ва цIа дурксса виричу тарбия хьусса кулпатрая, АхIмад-Хан жулла райондалийн увкIсса гьантрай ттулгу, мунал гъанчуналгу дакIурдиву хIасул хьусса пахрулул асардая.
АхIмад-Ханнул ппу Султан ивкIссар Ккуллал райондалийсса Цалчинмур ЦIувкIуллал шяравасса. Цайми куна, мугу лагайсса ивкIун ур цалва маэшатрал хъирив хIалтIилухун Къиримнавун, Алупка шагьрулийн. Султаннул ЦIувкIрав буссия ПатIима тIисса ссу ва чIявусса ляхъин. Аьпа биву, ттул ниттил нину буслан дикIайва цила ниттиуссу Султаннул Къиримнава личIи-личIисса ахъулссаннул посылкартту дучIайва, цаллагу муначIан ккурккимайртту, кьаркь дикI, уттулу-май, яттил нис гьан дайссия тIий. Мунила бусайва цал Султаннул чагъар бувкIшиву цанма щарну татар душ буцин ччай ура тIий. Мигу муний рязий хьуну бия. Хъиривмур шинал Насиба тIисса татар душнищал му буттал шяравун увкIун ур. КIиккува хъатIигу бувну, махъунмай тIайла бувкссия тIар. Цаппара шинну ларгун, миннал дянив хьуну ур 2 оьрчI. Оьрмулухун дакIний личIанс­сар ттула ниттил ссурахъу, жулла райондалийн увкIун, лак­рал халкьуннащал хьунаавкьусса 1971-ку шин. Лагмара лархъсса лозунгирттал, художествалул самодеятельностьрал коллективирттал балайрдал, идарарттай каялувшиву дуллалиминнал бувсса ихтилатир­ттал цалва тасттикь буллай бия щалвагу Дагъусттаннай АхIмад-Ханнул цIа цуксса бюхттулну ва сий дуну дуссарив.
Ми гьантрай Виричу хъамалу хьуссия ттул нитти­уссу ХIажикьурбаннул, ссурахъу СахIи­батлул ва жула къатрайгу. Хъамалушиндарай гьуртту хьусса республикалий ва райондалий каялувшиву дуллалиминнал, шяраваллил жяматрал бувсса ихтилатругу, гьаз бувсса кьурттигу, шяраву цIа дурксса балайчитурал увкусса балайрдугу АхIмад-Ханнун цIакьсса цIуллушиву, захIматсса давриву хъиннура бюхттулсса хьхьичIуннайшивуртту чIа тIутIисса хьуна.
Ттун хъинну ххуйну дакIний бур АхIмад-Хан Султан ттула бу­ттал ХIусайнов ХIажинал ва Арал къатлувун хъамалу увкIсса чIун. На буссияв 7-мур классраву. Га дия АхIмад-Ханнущалсса жул кулпатрал цалчинсса хьунабакьаву. Жул къатри бия ккуччу тIий бувцIуну гъанминнал ва шяравусса халкьуннал. Гьарцама ия ганачIан гъан хьун ччай. Га ия лахъ акъасса, дянивсса чурх бусса. Цинявннащал хъямалагу агьну, ттул чIивимур ссу ПатIимагу канил бувгьуну, цIухлай айивхьуна циняв гъан-маччаная. ПатIима бия АхIмад-Ханнул бу­ттарссин цIасса 3 шинавусса душ.
Ттул ниттихь, Арахь, ганал бувсуна цалва кулпатрая, ганал ия 2 арс. Циняв халкь бия тамашалий буруглай гайннал хъазамирттайсса чанна цIурттах. Яла ттул ниттищал лезгинкалий къавтIунгу ивзуна.
Ганащал архIал увкIун ия цIа дурксса артист Ярагъи ХIажикьурбанов. АхIмад-Хан ганахь ия «Больше дела, меньше слов» , — тIий. АхIмад-Ханнун къа­ччия чIявуну гъалгъатIун.
Ханум МахIаммадова, ЦIуссаккуллал цалчинмур школданул директор