Щаллагу дунияллийх цIа ларгсса ЦIувкIуллал пагьламантурал шярава 200 чув лавгссар Ватан дуруччин. Миннавасса цанная, гьашину оьрмулул 90 шин хъанахъисса, Рамазаннул арс СантIуев Аьлиллуятур ттул макьала. Мунал пишава аьралийчунал, яъни Ватан дуруччайманал, пиша бур.

Ца Аьлил Рамазановичри ЦIувкIуллал фронтовиктурава хIакьину сагъну уссавагу. Гъинтнил тIабиаьт утта дурксса та кьурчIисса кьини, июнь зурул 22-нний 1941 шинал, оьрмулул 16 шинавусса жагьил, СантIухъал Аьлил, Буйнакскаллал педучилищагу ЯтIул дипломрайну къуртал бувну, буттал шяраву учительну зунсса хиял бартлаган най бурхха тIий, ххарил лехлай най ивкIссар шяравун. Дипломгу жиплуву бивхьуну нанисса оьрчIал бакIраву тIааьнсса щугълурду щуруй бивкIссар, амма буттал шяравун ияйхту, мунан шяраваллил агьлу дяъви байбивхьуну бусса бур тIий къуману лявкъуссар. Так агьалинан мяълумну кIулну къабивкIун бур му ппурттуву щищалсса дяъвирив. Аьлил Рамазанович дакIнийн бутлай ур, жямат паракьат бан­сса мурад­рай, гьарзат кIулсса ва гъалгъатIун гъирасса Аьйшат-бавал, «Ци дяъви тIий буру, турк бакъа жуйнма ххяххайсса цайми бакъассар» куна, туркная жунна хъуннасса нигьачIаву дакъассар, ми ччяни бух бантIиссаргу тIий, шяраваллил къужри ккурчIату ппив хьуна тIий. Хъирив кьини кIул хьуну бур жунма дяъви баян бувмигу турк бакъашиву, немецнаяр ххув хьунгу, ай, къабигьашиву… Аьлиллулгу пикри бувну бур, агарда аьрая цIуллуну зана хьурча, учительну зунгу кьисмат хьунссар, цал душман Совет билаятрая лихъан уван аьркинни тIисса. Военкоматрайн лавгун ур цува аьрайн гьан увара тIисса аьрза булун. «Дяъвилийнгу иянссарача, цал вил кумаг шиккува аьркинну бур», увкуну, му налогру датIаврил инспекторну зун тIайла увккун ур. БувчIлай бурхха дяъвилул чIумал му цукун захIмат-жапасса даву диркIссарив, амма дува кусса даву къадурну чара ция! ЧIунархIалми аьрай бухьувкун, Аьлил Рамазановичлун цукунчIав къинттуллух зун ччай къабивкIун бур. КIилчингу фронтрайн тIайла уккияра тIисса аьрза буллувкун, 1943 шинал, июль зурул 4-нний тIайла увккун ур аьрайн. Мунан му ппурттуву 18 шин хьуну диркIун дур. Мунащал Дагъусттанная Ттуплислив аьрали ишру лахьлан тIайла бувккун бур 360 инсан, ми сайки циняв 1925 шинал бувсса бивкIун бур. Яъни 18 шинал оьрмулувусса. 1943 шинал сентябрь зуруй Аьлил Рамазанович усса 415-мур артиллериялул полк дяъвилул цIу къизгъиннийн багьну бур. Донбасс тархъан буллалисса талатавуртту най диркIун дур. Тикку чIявусса дагъусттанлувталгу ливтIуна, оьхIалсса талатавуртту най дия, тIий ур. Ванан ххуйну дакIний бур Днепродзержинск тIисса шагьрулучIа Днепр неххал ялтту бивкIшиву Европанавусса яла ххуймур ламу, цуппагу 3 зивулийсса. Му ламу немецнал ппив-ххив бувну бур. «Тукунсса ххуйшиву пуч-палачат дайссарив?» тIий къащилий буслай ур. Днепропетровск ва Днепр нех душманная мурахас даврихлу Аьлил Рамазановичлун «ЯтIул цIукул» орден дуллуну дур. Гьуртту хьуну ур Чехословакия, Польша тархъан буллалисса талатавурттавухгу. Польшанал Краков тIисса цалчинмур хъуншагьру тархъан буллалими талатавуртту къизгъинссара хьуна тIий ур. Дяъви къуртал хьуну бур Аьлил Рамазанович Бреславрай усса ппурттуву. « Жул частьрал немецнал хъунмасса группа вив лавсуна, му дия 9-мур майрал кьини, бух шаврил ссибуцIин бувсса немец кьянкьану данди бавцIуну бия, жуламигу аслант кунма талай бия, роталувусса 48 инсанная так 8 сагъну ливчIуна му талатавриву. Ми аьрали гьалмахтал тачIав хъамагукъабитай, цинявннал чувшиврий жанну кьурван дурна», — дакIнийн бутлай ур ветеран. Аьрай лавсъсса наградарттавух дур мунал Буттал КIанттул цIанийсса I даражалул ва ЯтIул ттугълил орденну, «За отвагу» ва «За боевые заслуги» медальлу. Тамаша бизансса иш бур мунайн цаллагу щаву къадияву, цIунцIия къашаву. Дяъви къуртал хьуну мукьахгу шин ва дачIинний аьралийчунал къуллугърай ивкIун ур Германиянаву, амма «тасса-танингу лялиллай бакъая немецнайнсса сси, душманну бия миннал гъюжу бувксса Берлингу», тIий ур. Дяъвилий чIявусса хIаписартал ливтIукун, ЯтIул армиялий биял къахъанай бивкIун бур хIаписартал. Жагьилсса саллатI ва сержант аьралий училищардавун дуклан гьан буллай бивкIун бур, мукун 1950 шинал хъунама сержант СантIуев Аьлил дуклан увххун ур Алукснинский зенитно-артиллериялул училищалувун. 1951 шинал мугу ххуйну къуртал бувну, МахIачкъалаллал зенитно-артиллериялул полкравун зун тIайла увккун ур. 1960 шинал полковникнал чиндалуву аьралий къуллугъ кьабивтун бур. Муния махъ зий ивкIун ур Дагъусттаннал шяраваллил хозяйствалул сельхозтехникалул отделданул хъунаману, трест «Дагводремстройрал» отделданул хъунаману. Миккусса даврингу ххуйсса кьимат бивщуну бур хIукуматрал. ЦIанакул Аьлил Рамазанович пенсиялий ур, мунал ххуйсса кулпат бур. Шагьзадал цIуру-кIуру къабувну ласнащал бивтун бур аьраличувнал ххуллурду, душ Зинаида Аьлиловна, ххуйсса хIакин-терапевт, зий бур МахIачкъалаллал 1-мур азарханалий хъун хIакиннал хъиривчуну. Душнил оьрчIру ва миннал наслу ветераннал яла хъунмур ххаришивугу, тирхханнугу дур. Оьна ацIан къакIулсса СантIухъал Аьлиллул пенсиялийн уккайхту аьраб чичру, Кьуран лавхьхьуну бур. ЦIувкIуллал бивкIурдай мунал кьулгьу-кьуран бувккуну, хъатIай тямадашиву дурну, жямат зукьлакьи байссия.
Ххувшаврил байрандалул гьантрай жямат МахIачкъалалив Совет Союзрал кIийла Виричу АхIмад-Хан СултаннучIан батIайсса аьдат­рал гьану бивзминнавух мугу уссия. Жагьилтурал маслихIатчири. Бугьараминнал дакIниймур ласайсса дусри. ХIакьсса тарбиячири. «1960 шинал ноябрь зуруй Ураллай американал разведка дуллалисса У-2 самолетгу руртун, летчик Пауэрсгу ясирну увгьуссия, му иш хьувкун, МахIачкъалалия жул полк Кироврайн бизан бувна, ттуйнгу зенитно-артиллериялул батареялий каялувшиву дуллан тапшур бувна. Амма американал летчикнан-разведчикнан бакьай байхту, ца душмансса зимиз жулла территориялийн леххан къасивсу­ссар. Таний жулва армиялул сий бюхттулсса дия, кьуват бия, энадрай сукку хьунахь дужагьрал цIу учин бюхъайсса бюхъулул заллухъру бияв», -тIий ур СантIуев Аьлил.
Ва ххарину ур гьашину Ххувшаврил байран лахъа-хъунну дуллай бушиврия, жагьилтуран буттал аьрщи ххира хьуншиврулсса мероприятиярду дуллай бушиврия.
ДакIнийхтуну барча уванну Аьлил Рамазанович Ххувшаврил юбилейращалгу, цанна 90 шин шаврил юбилейращалгу.
МахIаммадбаг ХIусайханов, ДГУ-рал профессор, элмурдал доктор, Цалчинмур ЦIувкIуллал Жяматийсса советрал хъунама
Таржума
ПатIимат Рамазановал