Дунияллул халкьуннал ниттил мазурдил кьинилун хасну МахIачкъалалив хьунни Дагъусттаннал шаэртурал назмурду ниттил мазурдий дакIних ккалаккисса конкурс. Муний лакку мазрайсса назмурду дакIних ккалаккиминнал дянив кIилчинмур кIану бувгьунни Гъумучиял школалул 11-мур классрал дуклаки душ Буттаева ТIагьиратлул (учительница Аьлиева ПатIимат).
ТIагьиратлул дурккуну дур шаэр, фронтовик Абачара ХIусайнаевлул «Та гъидайдихьулул цалчинсса кьини» тIисса назму. Конкурсрал жюрилуву бивкIми буслай бур ТIагьиратлул назму муксса дюхханну дурккушиву, цивппа макь дайгьин къахъанай бивкIшиву.
Хасну Абачара ХIусайнаевлул назмулий циван бавцIура куну цIувххукун, ТIагьиратлул бувсунни цинма хъинну дакIний ливчIшиву ванияр мукьра шинал хьхьичI Гъумучиял школалий Минажат Ухмачевал каялувшиннаралу хIадур бувсса Абачара ХIусайнаев ниттил увну 90 шин там шаврил юбилейран хас бувсса шаэрнал творчествалул мажлис. 8-мур классраву дуклакисса ТIагьиратлул та мажлисрай цилла гьурттушинна къадурну дур, щябивкIун бивкIун бур тамашачитуравух.
«Ттун хъинну ххуй дирзуна мяъна-мурадрал авадансса шаэрнал творчество, яла-яла дакIнин бювххуна «Гъумучиял шагьрулухь» ва «Та гъидайдихьулул цалчинсса кьини» тIисса шеърирду. Гьашину жулва билаят Хъун дяъвилуву Ххувшаву ларсун 70 шинал юбилей дуллан най бухьувкун, конкурсрай буккин язи бугьав «Та гъидайдихьулул цалчинсса кьини» тIимур шеъри, му дяъвилул темалун хас бувсса буну тIий ва цува шаэргу та дяъвилул гьурттучи ухьувкун», — тIий бур ТIагьират.
ТIагьират даин гьуртту шайсса бур тарихрал, обществознаниелул ва лакку мазрал дарсирдал олимпиадарттай ва бугьайсса бур хьхьичIунсса кIантту. ЦIанакул ТIагьират хIадур хъанай бур ЕГЭ-рдайн. Дуклан буххан ччай бур ДГУ-рал юридический факультетрайн. ЧIа учинну жувагу ТIагьиратлун тIайлабацIу.
