Январьданул 8-нния 11-ннийн бияннин Москавлив хьуссар духовой ва ударный инструментирттай руцаврил жагьилминнал дянивсса ТIиртIусса Ю. Н. Должиковлул цIанийсса конкурс-фестиваль.

Бадрижамал Аьлиева
Аьрасатнал ва совет флейтист, Москавуллал консерваториялул профессор Юрий Николаевич Должиковлул цIанийсса конкурс-фестиваль гьашину мукьилчинни дуллалисса. Гьунар бусса оьрчIансса Мурад Къажлаевлул цIанийсса школалул тарбиячиталгу гьуртту хьунни му конкурс-фестивальданувух жулла республикалул чулуха.
Педагог Индира Зайдиевал флейталул классрал дуклаки оьрчIру Даниэль Буни, Екатерина ва Виталий Яблочниковхъул гьуртту хьуну бур ва конкурсраву лавайсса даражалий хIадур хьусса 70 флейтист усса группалувух. Конкурсравух аьмну гьуртту хьуну ур Аьрасатнал личIи-личIисса регионнаясса 200 оьрчI. Жулва оьрчIангу къабигьану бивкIссар миннащал бястлий буккан. Бунугу, лайкьну ккаккан бунни оьрчIал жулва Дагъусттан. Даниэль Буни «Флейта» номинациялуву хьунни 1-мур даражалул лауреат, «Ансамбль» номинациялуву 2-мур даражалул лауреатътал хьунни трио Даниэль Буни, Екатерина ва Виталий Яблочниковхъул.
Январьданул 12-нний Павел Слободкиннул Центрданий хьуну дур Ю. Н. Должиковлул цIанийсса конкурс-фестиваль лакьлакьисса хъуннасса концерт. Микку цалчинмур премия ларсъсса Даниэль Буни увккун ур сахIналийн Мурад Къажлаевлул «Романс» произведениялущал, махъсса вайми жулва оьрчIру тIурча – Евгений Магалифлул «Тарантелла» произведениялущал.
Конкурс-фестивальданул жюрилуву бивкIун бур Аьрасатнал музыкалул яла хьхьичIунми дуккаврил идарарттал педагогтал. Ми ва ххуллухгу рязийну ливчIун бур конкурсравух гьуртту хьусса оьрчIал кIулшивурттая, ми вай бяст-ччаллайн хIадур хьусса лавайсса даражалия.
Мурад Къажлаевлул цIанийсса музыкалул школданул 4 тарбиячи чIал къавхьуну гьуртту хьунтIиссар Москавлив Чайковскийл цIанийсса ва Пятигорскалий Сафоновлул цIанийсса конкурсирдавух. Ялугьланну вайннал цIу-цIусса ххувшавурттах.