Сентябрьданул 8-нния 13-ннийнин Каспийскаллал Аьли Аьлиевлул цIанийсса спортрал къатраву най дия МахIаммад-Ссалам Оьмахановлул цIа абад дуллалисса боксрал дунияллул халкьуннал 16-мур турнир. Дагъусттаннал цачIундур командалул 1-мур кIану бувгьунни.
Турнирданий гьуртту хьунни дунияллул 12 билаятраятусса 109 боксер. Цалла командарттал хIал ккаккан бан бувкIун бия Азирбижаннал, Арманинал, Гуржиял, Латвиянал, Эстониянал, Польшанал, Бразилиянал, Изряилнал, Белоруссиянал, Къазахъисттаннал, УзбакIисттаннал, Аьрасатнал спортрал делегациярду. ЛичIисса команда сакин дурну дия Дагъусттаннал боксертуралгу.
Турнирданий личIи-личIисса журалул медаллу ларсунни сайки циняв командарттал, так Изряилнал ва Польшанал командарттал къадурххунни царагу журалул медаль.
Дагъусттаннал командалул дурххунни 4 мусил медаль, 4 арцул ва 3 чарвитул медальлу. 91 килорал кIушиврий мусил медальданун лайкь хьунни Дагъусттаннал цачIундур командалул хъунама МахIаммад Оьмаров. Финалданий ва ххув хьуссар Шамил Дибировлуяр. Уттигъанну Ростов шагьрулий хьусса Аьрасатнал чемпионатрай Оьмаровлул 3-мур кIану бувгьуссар. Га гьуртту хьуссар 2012 шинал Лондоннал Олимпиадалийгу. М. Оьмаров ххув хьуссар 2013 шинал Къазаннай хьусса гъинтнил дунияллул халкьуннал универсиадалийгу. Ва Оьмахановлул турнирданий Оьмаровлун дуллунни Владимир Путиннул чулухасса ХIурматрал грамота дукIу универсиадалий ххув шаврин хасну.
64 килорал кIушиврий ххув хьунни Ислам Мажидов, 69 килорал кIушиврий – Рабадан Кьурбанов, 81 килорал кIушиврий – МахIаммадмурад Арсланбеков.
Арцул медаллу ларсунни 91 килорал кIушиврий Шамил Дибировлул, 75 килорал кIушиврий – МахIаммад Мадиевлул, 52 килорал кIушиврий Аьлимхан ХIайдарбиевлул, 56 килорал кIушиврий – ХIасан Арсункаевлул. Чарвитул медаллу ларсунни Казбек Солтухановлул (49 килорал кIушиврий) ва Заур Аьбдуллаевлул (64 килорал кIушиврий).
Командарттавату 2-мур кIану бувгьунни Аьрасатнал командалул. 60 килорал кIушиврий боксрай увккунни цалчинмур ккурандалуву ингушнал миллатраясса Ися Чаниев жула Альберт Селимовлущал. Микку ххув хьунни И. Чаниев. Финалданий Ися Чаниевлул ух унни Латвиянал боксер Артем Рамлав. Му куццуй И. Чаниевлул дурххунни мусил медаль. Аьрасатнал командалул дурххунни 2 мусил, 2 арцул ва 4 чарвитул медальлу.
ЛирчIми командарттава Арманинал командалул дурххунни 1 мусил, 1 арцул ва 3 чарвитул медальлу. УзбакIисттаннал командалул – 2 мусил, 1 чарвитул, Бразилиянал командалул – 1 мусил, 2 чарвитул, Латвиянал командалул – 1 мусил, 1 арцулсса, Белоруссиянал командалул – 1 арцул, 1 чарвитулсса, Гуржиял – 3 чарвитулсса, Азирбижаннал – 2 чарвитулсса, Эстониянал – ца чарвитулсса, Къазахъисттаннал – 3 чарвитулсса.
