Январьданул 14-нний «Дагестан» РИА-лул конференц залдануву хьунни Республикалул культуралул министр Зарема Буттаевал «открытая власть» проектравусса пресс-конференция. Пресс-конференциялий гьуртту хьунни республикалул журналистътал ва блогертал.

БакIрай Зарема Буттаевал бувсунни Дагъусттаннал культуралул политикалия, цукунсса дахханашивуртту хьун аьркинссарив культуралул иширттаву, культуралул агьамми масъалартту цуми хъанахъиссарив. Культуралул министрнал мукъурттийн бувну, агьамми масъаларттавух бур республикалул культуралул зузалтран социальну кумаг баврил, культуралул учреждениярттал материаллал ва техникийсса база аьркинмунил щаллу баврил ва цаймигу масъалартту. Шиккува бусан, 2014 шин Культуралул шин хъанахъиссар.
— Дагъусттаннай культуралух къулагъас ххи дан аьркинни жагьилтал тIайласса ххуллий тарбия бавринсса инвестиция хIисаврай, цанчирча Дагъус­ттаннал ялун бучIанмур культура дусса инсантурая хъарну буну тIий, — увкунни министрнал.
Зарема Буттаевал бувсунни гьашину дуллансса мероприятиярттаятугу. Миннувух дур жулла республикалий аьдатравун дагьсса ва дунияллул халкьуннал даражалийсса фестиваллу. Масалдаран, «Каспий – берега дружбы», «Россия, родина моя» ва цаймигу. Мукун министрнал бувсунни гастроллай лагаврил давурттаятугу.
Зарема Буттаевал цищала лавсун бувкIунни журналистътуран ккаккан бан Дагъусттаннал районнай цIуну тIитIлатIисса Аьрасатнал халкьуннал традициялувусса культуралул центрдал буклетру.
Яла министрнал жавабру дуллунни журналистътурал буллусса суаллахьхьун. «Илчилул» вакилнал буллунни респуб­ликалий совет заманнай кунмасса худсоветру сакин баврил хIакъиравусса суал. Цанчирча ччарча официальну байраннан хас дурсса концертирттай, ччарча телевидениялий ккаккан дуллалиминнуй тачIав къабав­ссар балайчи уккан хьхьичI конферансьел ягу цува балайчинал кIицI бувну, щил мукъурттийсса балай учинтIиссарив ва макьандалул автор цу уссарив. Балайлул ва макьандалул автортал кIицI къабарча, га балайчи цува хъанай ур миннул авторгу. Мукунсса тагьар чувчIав дакъассар жучIара дакъасса. Министр рязи хьунни му суалдания. «Мугу культура дакъашивур, жулва концерт дуллалиминнал чара бакъа баян буллан аьркинссар назмулул ва макьандалул автортурал цIа-бакI. Жу хIисавравун ласунну худсоветру сакин баврил масъала», — увкунни ганил.
Суаллу буллунни личIи-личIисса, Нарын-Къалалул реконструкция даврийн, художниктуран мастерскойрду баврийн багьайсса ва цаймигу. Министрнал циняв суаллахьхьун дуллунни жавабру ва ахирданий бувсунни журналистътурал культуралул масъаларттах къулагъас ххи дуллан аьркиншиву.