ДР-лул Прокуратуралул тапшур бувну, МахIачкъалаллал Ленинский райондалул прокуратуралул цайми идарарттал – Роспотребнадзорданул, Росприроднадзорданул, ТIабиаьтрал луртаннал ва экологиялул, Строительствалул ва ЖКХ-лул министерстварттал пишакартуращал ххалбигьавуртту дунни Новый Хушет поселокрая арх бакъа бивхьусса керамикалул калпушру буллалисса заводрай.

Вай ххалбигьавуртту дан багьана хьунни Республикалул Прокуратуралул «вихшалдарал телефондалийнсса» оьвчаву. Новый Хушет поселокрай ялапар хъанахъисса инсантал рязи бакъа бур заводрай зузисса машинарттал ва механизмардал аьлагъужалул цивппа азурда буллай буру, заводрал турбардава оькки­сса пуркIу ва кьанкь най дур тIий.
Аьрзирал хъирив лаллай, завод бусса кIанайн лавгукун, чIалан бивкIунни завод зий, калпушру буллай бушиву, заводрал къатри къуртал дурну дакъашиву. Ми къатрал ООО заллусса 40904,85 кв.м. аьрщарал дургьуну душиву. Заводрал заллугу, застройщикгу хъанай дур 21.12.2002 шинал сияхIрайн ларсъсса ООО «Фирма Леко». МахIачкъала шагьрулул хъунаманал хIукмулийну (№1731. 15 август 2007 шин) ва аьрщи дуллуну дур ООО-лухьхьун производство дачин дансса мурадрай, амма ци производстварив ккаккан бувну бакъар.
2008 шинал август зурул 14-нний МахIачкъалаллал архитектуралул ва строительствалул надзорданул инспекциялул хъунаманал ихтияр дуллуну дур Архитектуралул ва градостроительствалул управлениялущал цалийн бувкIсса проектрай заводрал къатри дансса. Завод буллай бур хъуннасса лагрулул. Мунил залуннал пикри бур, лагма-ялттусса гьавалун, тIабиаьтран зарал биян къабуллалисса, ттизаманнул техникалул дузал бувсса идара дан. Дахьра цалчинмур линия зузи дурсса ва идаралуву гьарзат автоматирттайсса дур. Ва линиялий дахьа кIия оператор зий ур. Пикри бур шикку 20 инсан зузи ансса.
КIицI къабувну къабучIир, цинявппагу заводрай зузими жула республикалул агьлу бур, «бичтал» зузи бувну бакъар шикку.
Фирмалул каялувчитурал миннащал цичIар дахIаву дакъар.
Инсантал къума-цIан буллалисса, миннал ихтиярду ссуссукьу дуллалисса, харжирдая арцурду дугьлагьи­сса кIанттурду хьунакъабавкьунни. Умудругу, пикрирдугу ххуйсса бур. Амма закондалул тIалавшиннардава буклакисса кIанттурдугу хъанай бур. ООО-лул каялувчитурачIасса завод­рал проектная документация закондалул тIалавшиннарду щаллу къадурсса дур.
Му документация градостроительствалул ва архитектуралул управлениялущал маслихIат ккавкссагу дакъар. ДР-лул Строительствалул ва ЖКХ-лул министерствалул ва МахIачкъалаллал архитектуралул ва строительствалул надзорданул инспекциялул бусласимунийн бувну, завод зузи бансса ихтиярду дуллуну диркIун дакъар. Строительствалул надзорданул управлениялул пишакартурал бувсмунийн бувну, завод зузи бувну бур Градостроительный кодексрал тIалавшиннарду къадурур­ччуну, яни зузи бансса ихтияр дакъана. Градостроительствалул, санитариялул ва эпидемиологиялул хIакъиравусса законнава буккаврицIун вайннал дурурччуну дакъар лагма-ялттусса кIанттурду буруччаврил, тIабиаьт ишла даврил ва предпринимательствалул чулухуннайсса тIалавшиннардугу. Роспотребнадзорданул мяйжан бунни, заводрай бикIу, лама-ялттусса кIанттурдай бикIу, аьлагъужа бушиву, му бучIи буллалиссаннуяр лахъсса бушиву. Амма заводрая гьавалувун нанимур инсаннал цIуллу-сагъшиврун зарал биян буллалисса, бучIиссаннуяр ххишаласса дакъар.
ООО закондалул ххуттава бувксса иш цамургу бур – вайннал баян бувну бакъар аьркинсса органнайн зий байбивхьушиву.
Вай цинявппа закондалул тIалавшиннарду щаллу къадурсса ишру хIисавравун лавсун, заводрал ва ООО-лул каялувчитурал хIакъираву 6 хIукму бувну бур. Заводрал даву чIумуйсса дацIан дурну дур. Ххалбигьавурттал чIалачIи бунни мукунма Новый Хушет поселокрайсса агьалинал къатри закондалул бучIи буллалиссаннуяр гъанну душиву заводрачIан. Уттигу ххал буллай бур агьалинал къатри дан ихтиярду дуллалисса документру закондалул тIалавшиннардацIун бавкьусса бурив.
С.А. Аьбдуллаев
МахIачкъалаллал Ленинский райондалул прокурорнал хъиривчу
ХIадур бувссар А. Аьбдуллаевал