Лакрал райондалул школарду цIусса дуккаврил шинайннин хIадурну бурив ххал буллай занай бур райондалул администрациялул комиссия. Цивунгу бухлай бур райондалул администрациялул бакIчинал хъиривчу Соня Макьаева, кIулшиву дулаврил управлениялул хъунама Явсупи ХIамзаев, Лакрал ва Ккуллал районнайсса Роспотребнадзорданул хъунмур Зулайхат Макьсудова, пожарный частьрал хъунама Мурад АьдурахIимов.

Зулайхат Тахакьаева
Райондалул кIулшиву дулаврил управлениялул хъунама Явсупи ХIамзаевлул бувсунни гьашину школардал ремонт дан ва цIарая мюхчаншиврунсса шартIру дузал дан райондалул бюджетрава итадаркьушиву 1 млн. ва 500 азарда къуруш арцул.
ХIугу-хIулувхIуну, сирду бувккун бур райондалул цинявппагу школардаву. Ца­ппарасса школардай баххана бувну бур чIавахьултту. Ххуйсса хIадуршинна дурну дур ШавкIуллал школалий (директор Какваева Асли), Кьубиял школалий (директор Братилов Муса), Щардал школалий (директор Ибрагьимов Ибрагьим).
Ххуллун кьини райондалул кIулшиву дулаврил управлениялул каялувчи Явсупи ХIамзаев лавгунни Уриннал ва Мукьардал школардал ялтту уккан.
Ларгсса шинал Уриннал школа капитальныйну бакьин бувссар. Магъи даххана дур­ссар, чардагъ дурссар, пластикалул чIавахьултту бивхьуссар. Дурмуний гьашиву къадурну, гьашинугу шикку зий бур ремонтрал давурттаха. Школалул хьулу тачIав баргъ къабагьайсса чулий бухьувкун, бургъил чулийнмай цIусса хьулу буклай бур. Даххана дурну дур ттукIрал ххаллу. ХIулувхIуну, сирду бувккун бур. Ва школалийн, шиччавасса бакъассагу, занай бур Мукьардал, КIамахъаллал, Ппалассуннал ва Хъанардал оьрчIругу. Вай шяраваллал дук­лаки оьрчIру хьхьичIва занай бивкIун бур Гъуниннал райондалийсса чIаххувсса Щангъиял шяравусса интернатрайн. КIулшиву дулаврил управлениялул каялувчи Явсупи ХIамзаевлул ва школалул директор Даниял Кьурбановлул сипталийну школалий хIасул дурну дур лагма щархъавасса оьрчIру занансса шартIру. ЦучIав ялапар къахъанай, леркьсса къатри дакьин дурну, гиву бувну бур гъилисса дукра дувансса, дукансса ва оьрчIру бигьалагансса къатри.
Шаннагу чIумух гъилисса дукра дулайсса дур школалийн заназисса 35 оьрчIан. Мукьардал оьрчIру дарсирдая махъ шаппай гьарчагу, кIинттул дяркъу дусса, ххуллурдайх микI-чIикI дусса чIумал оьрчIру гьантта бикIавансса шартIру дузал дурну дур. Мукунсса оьрчIру шикку бур 12. Ханты-Мансийскаллал мэрнал хъиривчуну зий ивкIсса ва шяраватусса Амиров ХIажинал дуллусса арцух лавсун бур цIусса тахру. Школалий зузи­сса цинявппа учительтуралгу июнь зурул стимулирующий арцу кьадиртун дур школалун кумагран.