Апрель зурул 2-нний Дагъусттаннал ХIукуматрал председательнал хъиривчу Рамазан Жяъпаров ивунни ЦIуссалакрал райондалийн, гийхсса иш-тагьар ххал дуваншиврул.

Райондалул хъунама ХIажи Айдиевлущал ва Халкьуннал Мажлисрал депутат Зайнуллагь Мирзоевлущал Рамазан Жяъпаров ивунни Гьамиящиял, ЦIуссамехелтIиял, Ямансулийсса буллай къуртал къабувсса школардайн.
ХIажи Шихамировичлул бувсунни цIусса дуккаврил шин дайдишиннин ЦIуссамехелтIиял школалунсса агьаммур корпус бувну къуртал буван багьлай бушиву, тавакъю бунни хIукуматрал вакилнахь му иширан кабакьу бува куну.
Рамазан Жяъпарович ивунни, мукуна, ТIюхчаравсса, Бонаюртливсса, ЦIуссачIурттахьсса школардайнгу. Шяраваллавух увккун мукьах, му хьунаавкьунни райондалул активращал. ХIажи Айдиевлул му батIаврий доклад бунни райондалул социал-экономикалул ларгсса шиналсса тагьардания. Мунал балжийну бувсунни райондалий хIакьину цукунсса тагьар дуссарив, цуку-цукунсса давурттив дуван багьлай буссарив.
— Лак цIусса миналийн бизан баврил масъалалух хъуннасса къула­гъас дуллай ур республикалул президентнал къуллугъ чIумуйну биттур буллалисса Р. АьбдуллатIипов, — увкунни Р. Жяъпаровлул. – Му программалул масъалартталсса буллалисса комиссиялул хъунама нуна ивтунна. Жу хIарачат буллай буру агьали цIусса миналийн бизан баврил программа дагьайкун бартдигьин. Зунгу кIулссар агьаммур масъала арцул дузалшиннараву бушиву. Ларгсса нюжмардий Москавлив лавгсса чIумал, Р. АьбдуллатIиповлул миккугу ххал бивгьуссар Новострой ччаннай бацIан баврил масъала. Федерал хIукуматращал кьутIи дурссар 2013 шинал Новостройрай къатри дуллан 1,5 миллиард личIи бан ва инфраструктура, социал объектру бангу кIива миллиард личIи буван. Строительствалул даврил ревизия бувссар Новостройрай, даву цукунсса бущилий най дурив кIул баву мурадрай. Парламентрал лавгмур сессиялийгу ххалбивгьуссар лак цIусса миналийн бизан баврицIун бавхIусса кIива масъала. Экономикалул министрнал бувсуна бизан баврил программа бартдигьаврия, 2011-2013 шиннардийсса тагьардания. Микку парламентрал маслихIат бувссия хIукуматран Новостройрай социал инфраструктура давриха ва зузи кIантту бавриха зун.
Сессиялул, мукунма, хъинчулий ккавккуна ЦIуссалакрал райондалул депутатътурал корпусрал ДучIиннал шяраваллин Зориотар ва НицIавкIуллалмунин Борчхойотар цIарду дизаву маслихIатрайсса предложение. ДучIиннал ва НицIавкIуллал шяраваллурду тIурча Новостройрай цIакь дуллалисса документру федерал ведомствалийн тIайла буккавугу маслихIат бувна.
— Политикалулми масъалартту 90-ку шиннардийва щаллу бувну бур, личIлай бур экономикалул, финансирдал масъаларду щаллу буллан, — увкунни Рамазан Жяъпаровлул. – Лак рязий хьуну бур бизан, цIусса кIанттай лакрал оьр­му ххуй буллалисса къулайсса шартIру хIасул дуллан аьркинссару. Чачаннан ччай бур Аухнал район цIудуккан дуван, мунилссагу буллалиссару. Яруссаннан ччай бур ЦIуссалаккуйва бацIан, минналмур мурадгу щаллу хьунтIиссар. ЧIиви-хъунсса масъалалул ялув Москавлив президентнайн чагъарду чичлан аьркин бакъассар, чичара на каялувшиву дуллалисса комиссиялийн, шиккува ххалбигьинну ми масъалартту. Рамазан Жяъпаровичлул уттинин райондалул хъуниминнал социал-экономикалул тагьар къулай даву мурадрай дуллалисса даврингу ххуйсса кьимат бивщуна.