[dropcap]М[/dropcap]арт зурул 2-нний МахIачкъалалив Дусшиврул къатраву хьунни WorldSkills Russia «Жагьилсса пишакартал» тIисса региондалул III-мур чемпионатрал хIасиллал мажлис.

Имара Саидова [dropcap]Ш[/dropcap]икку гьуртту хьунни 150-нния ливчусса жагьилтал ва микссава экспертътал. Му бакъассагу, гьашинусса чемпионатрай гьурттушинна дунни личIи-личIисса регионная бувкIсса хъамаллурал, жяматрал ва политикалул ишккаккултрал, хьхьичIунсса компаниярттал каялувчитурал. Мажлис тIивтIуна дуниял­лийх машгьур хьусса «Лезгинка» ансамбльданул къав­тIавурттайну. СахIналий кка­ккан дунни чемпионатрал даврия ва микку гьурттушинна дуллалиминнал пишардал усттаршиврия бусласисса видео. Хъирив ихтилат бунни ДР-лул захIматрал ва социал хьхьи­чIунмайшиврул министрнал буржру биттур буллалисса Расул Ибрагьимовлул.

- Чемпионат нанисса шанма-мукьва гьантлул мутталий 300-нния ливчусса жагьилтурал ккаккан дунни цала-цала пишар­дал усттаршиву. WorldSkills Russia чемпионат дуллай байбивхьуния шихунмай инсантуран кIул хьунни захIматрал пишарду хIакьинусса заманнай тIалавну бушиву. Гьашинусса чемпионатрай жагьилтурал ккаккан дунни 24-хъул журалул пишардал усттаршиву. Чемпионат жула республикалун хъуннасса агьамшиву дусса хъанахъиссар, цанчирча экономика хьхьичIуннай шаву хъар хъанай дуну тIий так квалификация дусса пишакартурайн, - увкунни Расул Ибрагьимовлул. Муния махъ сахIналий барча бунни ва арцуйнусса бахшишру дуллунни бяст-ччаллаву хьхьичIунсса кIанттурду бувгьусса пишакартуран.

Жагьилтал барча буллай, миннан медальлу, хIурматрал грамотартту дуллай ия Республикалул жагьилтал давур­ттал дузал буллалисса «Успех» центрданул директор Шамил МахIаммадов. Ва чемпионатрай ххув хьу­сса жагьилтал кьамул бантIиссар Дагъусттаннал цачIун дур командалувун, гьашину Южно-Сахалинскалий хьунтIисса «Жагьилсса пишакартурал» миллатирттал VI-мур чемпионатрай гьурттушинна дан. Ва чемпионатрай, муданма кунма, гьашинугу хьхьичIунсса кIанттурду бувгьунни Каспийскаллал Серго Орджоникидзел цIанийсса Машиностроениялул ва сервисрал колледжрал студентътурал.

«Инженерный дизайн» компетенциялий цалчинсса кIану бувгьунни Исяев Кьурбаннул, кIилчинмур – Каримуллагь Сулаймановлул ва шамилчинмур – Фарид Амировлул. «Токарные работы на станках с ЧПУ» компетенциялий цалчинсса кIану бувгьунни Мевлюд Таибовлул, кIилчинмур – Сяид Залимхановлул ва шамилчинмур – Илдар Тажуттиновлул. «Фрезерные работы на станках с ЧПУ» тIисса компетенциялий цалчинсса кIану бувгьунни Арслан НурбахIандовлул, кIилчинмур – Муслим МахIам­мадовлул, шамилчинмур – ТIагьир Жабраиловлул.

Автоххуллурдал колледжраву хьусса «Машинартту бакьин баврил» бяст-ччаллаву шамилчинсса кIану бувгьунни вава колледжрал студент Сяид Халатовлул.