[dropcap]С[/dropcap]ентябрь зурул 23-24-нний МахIачкъала шагьрулун 160 шин шаврицIун дархIусса шадлугъру дикIантIиссар.

П. Рамазанова Ва кьини чун гьан хъинавав тIисса шагьрулул агьулданун ва хъамаллуран ххуйсса программа хIадур дурну дур шагьрулул хъуниминнал. Масалдаран, 23-нний, ххуллункьини, кIюрххия гьанттайнин Пушкиннул цIанийсса кIичIираву кIанттул предпринимательтурал ва общепитрал продукция дахлантIиссар. Ссят 13:00 хьуну МахIачкъала шагьрулул тарихрал музейраву дикIантIиссар «Живописная Махачкала» тIисса выставка. Ссят 13:30 хьуну Дагъусттаннал университетрал хьхьичIсса майданнив дикIантIиссар концерт. Ахттая гьанттайнин Расул ХIам­затовлул цIанийсса проспектрай бикIантIиссар 14-вагу миллатрал майданну. Дагъусттаннал педуниверситетрал хьхьичIгу ссят 15:00 хьуну дайдишинтIиссар 2 ссятрайсса концерт. Максим Горькийл цIанийсса Оьрус­нал драмтеатрданул хьхьичIсса майданнив ссят 15:00 хьуну, ссят 17:00 хьуннин дикIантIиссар аьдат­райсса культуралул дунияллул халкьуннал фестиваль «Цамаури». Ссят 16:00 хьуну 18:00 хьуннин кIира концерт цал архIал дикIантIиссар: ца – Ак-Гель паркраву, оьруснал интеллигенциялун хас дурсса Мемориал комплексрачIа, цагу – имам Шамиллул цIанийсса проспектрайсса «Усттартурал шагьру» сквердануву. Сайки кIюрххия гьанттайннин­сса концерт дикIантIиссар Родопскийл бульварданийсса Яруссаннал театрданул хьхьичIгу. Шагьрулул мюрщими агьлу шад бувансса концерт «МахIачкъалаллал чIавасса чаннацIуртти» ва къундалул скульптуралул фестиваль дикIантIиссар шагьрулул пляжрай. Ссят 19:00 хьуну Лениннул цIа­нийсса майданнив дайдишинтIиссар хъуннасса гала-концерт. Му къуртал шайхту, ссят 21:00 хьуну, дикIантIиссар фейервек ва жагьилтурансса дискотека. Шагьрулул хъуними дакI дарцIуну бур агьали, ссувхIат­райн кунма, байрандалийн буккан­тIишиврий. Гьарца мероприятие дусса кIанттай агьалинал мюхчаншиврул ялув цIакьну бавцIуну бикIантIий бур. Хъиривмур номерданий жугу бусанну цукунсса байран диркIссарив, лакрал цукунсса гьурттушинна дурссарив.