Хъунмасса Буттал кIанттул цIанийсса дяъвилий Ххувшаву ларсун 72 шин шаврин хасну, апрель зурул 6-нния байбивхьуну 13-ннийн бияннин Ухссавнил Ккавкказуллал муххал ххуллийх лавгссар «Ххувшаву» тIисса дяъвилул чIумалсса вагоннащалсса, таний кунма, ссихIирай зузисса поезд.

Апрель зурул 6-нний ссят 10.00 хьусса чIумал поезд бавцIунни МахIачкъалаллал муххал ххуллул вокзалданий. Поездрал кIива паровозравасса ца бур Сталинград шагьрулухсса талатавурттаву гьур­тту хьусса. Ва кьини МахIачкъалаллал му­ххал ххуллул вокзалданий дия хъуннасса шадлугъ. Поездрай тамаша бан бувкIун бия шагьрулул агьали. Ччиманаща бюхълай бия, вагоннавух бувккун, гьарзат ххал дан. Ретро-поезд хьунабакьлакьисса шадлугърал мероприятиялий гьурттушинна дунни Дагъусттаннал БакIчи Рамазан АьбдуллатIиповлул. - Хъунмасса Буттал кIанттул цIанийсса дяъви байбивхьусса чIумал Ватан душманная дуру­ччин 180 азарунния ливчусса да­гъусттанлувтал лавгссар, бачIи зана къавхьуссар. Жула 62 Совет Союзрал Виричу уссар. Дяъвилул цIараву цикссагу вирттаврал къучагъшиву кка­ккан дурссар. Та дяъвилий Совет халкьуннал ларсъсса Ххувшаву абадлий тарихраву личIантIиссар, - увкунни Рамазан АьбдуллатIиповлул, поезд хьунабакьин бавтIсса шагьрулул агьалинал ва хъамаллурал хьхьичI. Ухссавнил Ккавкказуллал муххал ххуллул хъунама Владимир Пястоловлул бувсунни «Победа» поезд Ххувшаврил байран гъан хъана­хъисса гьантрай укун занай гьашину арулчинсса шин душиву. Утти­нин ва Ставрополлал, Краснодардал крайрдайсса, Ростовуллал областьрайсса цимивагу шагьрулийн бившиву. Гьашинусса маршрут МахIачкъала шагьрулия дайдихьлай душиву. - Станциялия станциялийн нанисса поездрал чIунил ва шагьрурдал зума-къирагърайн бияннин баллалисса паровозрал щютIлил цал ттигу дакIнийн бутлай бур жунма та дяъвилий жула халкьуннал кка­ккан дурсса къучагъшиврия, Ватан дуручлай жанну дуллусса вирттаврая, - увкунни ванал. МахIачкъалаллал вокзалдания «Ххувшаврил» поезд лавгссар Грозный-Прохладный-Назрань-Владикавказ-Нальчик-Пятигорск-Черкесск маршрутрай.