Дагъусттаннал УФСИН-лул хъуннасса къулагъас дур дуснакьрал идарарттайн къадагъа дирхьусса затру ду­ххан къаритан. Му масъалалул ялув бацIаву дувай тIайла бацIан баврил идарарттайсса мюхчаншиврул отделлал зузалтрал.

- Управлениялул мюхчаншиврул группалул ва оператив отделданул 2017 шинал хъунмасса хIарачат бувссар дуснакьравуминначIан къабучIи буллалисса затру духхан дуллалисса иширттан ххуллу кьукьин. ХIакьинугу му масъалалул ялув хъинну бавцIуну буссару, - тIий ур Управлениялул хъунама инспектор, виваллил къуллугърал майор Ислам Аьлиев. 2017 шинал УИС-рал ида­рарттай хъиривлаявур­тту дурну, зерххуну дур дус­накьлувтурачIан биян бан кьаст лархIусса 139,92 гр. наркотикирттал, 87 сотовый телефон, 9,5 литра хIан-аьракьул. Му бакъассагу, 2017 шинал 75 иш ашкара бувну бур инсантурал уголов тахсиркаршивуртту ва административ тIулдакъашивуртту дур­сса. Миннава 48 инсан административ жавабрайн, 6 инсан уголов жавабрайн увцуну ур. Махъминнал хIакъираву ттигу хIукму бувну бакъар. Ислам Аьлиевлул бусласимунийн бувну, УИС-рал идарарттал мюхчаншиврул отделлал зузалтрал цIухла бишай­сса бур тIайла бацIан баврил идарарттайн нанисса гьарица инсаннахь. Ххал дайсса дур дуснакьравуминначIансса посылкартту, бандероллу ва передачартту. Ккаккан дурсса тIалав­шиннарду къадуручлай, низам лиян дуллай бур хъунмурчIин щябивкIминнал гъан-маччами. Ми кьаст лахIлай бур тIайла бацIан баврил идарарттайн ва силистталул изолятордайн къабучIи буллалисса затру дулун. Мукунсса тIуллу дуллай биривсса инсантал, хьусса тахсирданух бурувгун, танмихIрайн буцайссар. Дишин бюхъайссар 5 азарда къурушрайн дирсса аьчIа (ст.19.12 КоАП РФ), ягу дуснакь ан бюхъайссар 20 шинайн бияннинсса чIумуй (ст. 228 УК РФ). Дагъусттаннал УФСИН-лул пресс-служба ХIадур бувссар А. Аьбдуллаевал