Яла хьхьичIунма лакку мазрал учитель
Лакку мазрал ва литературалул дарсру дихьлахьисса учительтуран кабакьулун, кIулшиву дулаврил процессраву миллатирттал мазурдил агьамшиву ларай даву мурадрай, Ниттил мазрал кьинилун хас дурсса давурттал лагрулуву, Лакрал райондалул кIулшиву дулаврил управлениялул сипталийну, гьарца шинал байссар «Яла хьхьичIунма лакку мазрал учитель» тIисса конкурс.
Конкурсраву багьлай бия: ккаккан дан гьуртту хъанахъиминнал творческий материал; творчествалул презентация; тIиртIусса дарс дишин; дирхьусса дарсирал самоанализ дан; учительнал визитная карточка ккаккан дан. Конкурсрал хIасиллайн бувну, цалчинмур кIану бувгьунни Гъумучиял лицейрал учитель Аьбдулмажид Исмяиловлул, кIилчинмур кIану – Хьурттал школалул учительница Индира Сулаймановал, шамилчинмур кIану – ГьунчIукьатIрал школалул учительница Роза Аьлиевал. Цалчинмур кIану бувгьусса Аьбдулмажид Исмяиловлул тIиртIусса дарс дия лакрал шаэр МахIаммад-Загьид Аминовлул «Ттул нину» тIисса поэмалия. ХIадур бувссар Зулайхат Тахакьаевал