Декабрь зуруй Москавлив хьунни хIала-ккаласса боевой искусствардал (ММА) 12-13 шин хьуминнал турнир. Турнирданийн хIадуршин дурну дия дунияллул чемпион НурмахIаммадов ХIабиблул. Микку лачIунбуккавриву гьуртту хьунни МахIачкъалаллал №13-мур школалий 6-мур классраву дуклакисса НицIавкIратусса, Новостройрай ялапар хъанахъисса Оьмаров Жалал. Тренировкардайн занай дахьва 4 барз бакъа хьуну бакъанугу, Жалаллул гьунар ва хIарачат чIалай, тренернан ва Москавлив уцин пикри хьуну...
Кару дихьултрал чемпионат най дия Сулайман Стальскийл цIанийсса Лазгиял драмтеатрданул къатраву. Буниялагу кIукIлусса кIанттайгу щябивкIун, театрданул сахIналий бивхьусса кIива столданух кару дихьулт бястлий буккаврих буруглангу иштахIну бия. Ва чемпионатрай гьуртту хъанай бия чIявусса Аьрасатнал ва дунияллул чемпионтал хьусса спортсментал.
Декабрьданул 10-нний «Анжи» ччалли дурккунни Санкт-Петербургуллал «Зенитращал» 1:1 счетрайну ва мунийну къуртал хьунни Аьрасатнал чемпионатрал 1-мур бутIа. ЦIана МахIачкъалаллал «Анжи» дур турнирданул таблицалул 2-мур ххуттай. 2012 шинал премьер-лигалул махъва-махъмур тIуркIу хьуна Санкт- Петербургуллал «Петровский» стадиондалий. Голлу бавкьуна Жоао Карлослул ва Константин Зыряновлул.
