Ккуллал райондалий, Ккулув ва Вихьлив, бур кIива жагьилтурал спортрал школа. ЧIун-чIумуй вай школардал дянив шай бяст-ччаллий буклакисса хьунабакьавуртту. Апрельданул 7-нний Вихьуллал шяравусса спортшколалул залдануву хьунни ацIра волейболданул команда бяст-ччаллий дуклакисса соревнования.
Вай гьантрай Журналистътурал союзрай хьунни ДР-лул физкультуралул ва спортрал министр МахIаммад МахIаммадовлул пресс-конференция. Га бачин бувну ия ДР-лул Журналистътурал союзрал председатель Аьли Камалов.
Ларгсса бигьалагай кьинирдай Гуржиянал Ттуплис шагьрулий хьунни лачIун буккаврил Европанал чемпионат. Турнирданул хIасиллайну, командарттал бувгьусса кIанттурду хIисавравун лавсун, Аьрасатналсса хьхьичIунну дур. Хъаннил командалуву 2 мусил, 1 арцул ва 2 чарвитул медаллу ларсунни, лачIунбуккулт – классиктурал – 2 мусил, 2 арцул ва 1 чарвитулсса. Миннах бурувгун вольниктурал гьашину хьхьара дурну дур: 2 мусил ва 3 чарвитул...
Март байбихьулул гьантрай Псков шагьрулий хьунни хIала-ккаласса боевой искусстварттал «ориентал» журалул дунияллул халкьуннал турнир. Муданма кунма, га турнирданий гьуртту хьунни Дагъусттаннал ММА-рал хъунама тренер ва федерациялул президент Аьбдулкерим Айгуновлул вардиш буллалисса оьрчIру.
Мартрал 17-нний цIуну тIивтIусса «Анжи-арена» стадиондалий «Анжи» ччалли дурккуна Самараллал «Крылья Советовращал». Най буна бусанну: билаятрал первенствалийгу тIайлабацIу къавхьуна жулла командалун. «Анжи» (МахIачкъала) – «Крылья Советов» (Самара) 1:1. Голлу: Корниленко, Траоре. ЦIусса «Анжи-ареналул» трибунартту щапI куну бувцIуну бия тамашачитурал, тIуркIу байбишиннинма. Стадиондалий шадлугърал тагьар дия, га кьини тIивтIуна цуппа цIусса стадионгу.
Вай гьантрай кIул хьунни Дюкъуллал шяравасса Аьбдулкьадирдул ва Пирдавслул арс Халилов Зурпукьал кикбоксинграхун машхул хьуну, хьхьичIунсса кIанттурдугу бугьлай ушиву. ХIасан Аьдилов Мартрал хьхьичIми гьантрай Къарачай-Чаргаснал республикалийсса Теберда шагьрулий хьуну дур Ухссавнил Ккавкказуллал федерал округрал кикбоксинграл чемпионат.
Вай гьантрай Иркутск шагьрулий хьунни чIава жагьилтурал тайбоксрал Аьрасатнал первенство. Тикку, 57 килорал кIушиврий ччалли увккун, Хасавюртуллал СДЮСШОР-данул спортчи Арслан Батыровлул ларсунни мусил медаль. Финалданий лакку оьрчIал муттаэ хьуну ур, Ураллал федерал округрал 2-ла чемпион, Екатеринбург шагьрулиясса Владимир Кузьмин. Ганащал Арслан ччалли увкссар шанна раундрай.
Хъусращиял шяравасса Ибрагьимов ХIусман ушу-саньдалухун машхул хьуну ур дукIу. Ванал тренерну ур Руслан Аьбдуллаев. ХIасан Аьдилов Февральданул 23-24-нний хьусса ушу-саньдалул МахIачкъалаллал первенствалий ХIусманнул 3-мур кIану бувгьуну бур.
Спорт ххираминнан, спортрал дунияллий хъанахъимуния чанссавагу хавар буминнан ххуйну кIулссар «Молодой Дракон» тIисса оьрчIал ва мюрщи жагьилтурал спортрал профессионал клуб ва мунил каялувчи, республикалий спорт хьхьичIунмай бавриву цаламур захIматрал бутIа бивхьусса, гьунар бусса тренер Олег МахIаммадов.
Ларгсса алхIат кьини къуртал хьунни Красноярск шагьрулий Ярыгиннул цIанийсса лачIун буккаврил дунияллул халкьуннал турнир. Дагъусттаннал лачIунбуккултрал дурххуну дур 3 мусил, 2 арцул ва 2 чарвитул медаллу.
