БивкIу кьамул буллай бур гьарца инсаннал, бусурманчу унугу, акъанугу. ЦучIав тархъан хьуну акъар муния. Цинявннан кIулли жунма къакIулшиву так му та бучIантIиссарив.
Амма жунма хъамабитлай бур гьарица зараяр бивкIу, мунияту гъалгъа банвагу ччай бакъару. Хьхьувай шакъашанарчагу икъавчIан, цу ухьурчагу ивчIан най ур. Жунма бивкIу хъамабитарчагу, мунин жува хъамабитлай бакъассару. Амма гьарца зарая гъалгъа барчагу, ваниятугу къабувну къабучIир. Жунма багьлай бур гьарца кьини ччя-ччя бивкIулияту гъалгъа тIун ва хIадур хъанан. Жунма кIулли кьиямасса кьини дучIантIишиву. Щин кIулссар, Аллагьнан бакъа, му та дучIантIиссарив? Мунияту жунма хъинну пикри бан аьркинни шийва бунува ци хъинбала бан хъинавав тIий, оьккимур къабуллай, пикри бан цамур оьрмулия абадул-абадлийсса ахиратрая, дакIнийн бутан Алжан ва Дужжагь. Ява хъяврин къахьун аьрщарайсса неъматирттая, оьрмулия. Ххал бара цуксса чанну яхъанай бурув жува ва дунияллий. Цири жура ларсун нанисса ва дунияллия абадул-абадлийсса дунияллийн? Инсан уччин наникун, му тIайла уккан най дур шанна зад: гъан-маччами, мунал ляркъусса хъус ва мунал ялувва уна буллай ивкIсса ххуйсса аьмал. Ми гьарзадгу зана дикIлай дур, так аьмал най бур мунащал цала хъинмур чулухунмай бувсса. Зулла-зулла дакIурдин лавхьхьумурди тилугу бусса шийнияргу ххуйсса. ЦукунчIав маучара «та укунсса, тукунсса ур» куну, гьарцаннал цахлура жуав цалла дикIантIиссар. Кьиямасса кьини циняв нажи-нажи тIий цаманалсса бансса чIун дакъассар, цивппа ххассал хъанай. Жура данмур чIярури, амма битлай бакъару бивкIулул. Аллагьнан кIулссар дайдихьугу ва дунияллий дайлитIугу. Жунма гьарца кьини баллай бур ва пулансса инсан ивкIунни тIий, дарсну шайривав жувагу танал кунна кьаритантIисса ва чаннасса дуниял, тIитIайривав жулва яругу Аллагьнал ххуллийсса даву дан? Жува жулла давурттив дуллай буна, бивкIу буруглай бур гьарца инсаннах дунияллийсса. Му буруглай бур жухва гьарца мурцIниха, занай бур жулва чIарах шиннардий, яругьлай Ялату амру баннин. Хъунасса Заннал буллуну бакъар жунма оьрму ссанчIав бакъа оьнма гьан бан. Ганал ккаккан бувну бур жунма тIайласса ххуллу ва шартIру. Жунмагу аьркинни бачин, Ванал тIимуних булуншиврул жунма ххазина, ссайгъат. Ва оьрму ччяни лагайссар, янил ляпI учиннин. Цумур оьрмулий ивчIарчагу, инсаннан чIалачIиссар цува чанну яхьусса куна. Инсан къауххайссар оьрмулия. Аллагьнал чIюлу бувну бур ялувсса оьрму, амма ккаккан бувну бур хъяврин къахьун ганил чIюлушиндарал. ХIадур бара зунмасса ххазина тамур дунияллийнсса, мугу хъанай бур Аллагьнал тIинийх бачаву. ЩинчIав къакIулссар та къуртал хьунтIиссарив ва ялувсса оьрму. Жува буклай буру къатлувату зана бикIансса ххай, амма Аллагьнаща цамур куццуйгу бан бюхъайссар. Мунияту жува хIадурну бикIан аьркинссару ва дунияллия ччимур чIумал гьан.
Леххаву тIий буру Аллагьнахь цIакь бан жува Исламраву тIайласса ххуллий, ялтту учIаннав хъунасса Зал ливтIуминнал бувсса бунагьирттал. Ххари баннав гайннал ялувва буна дурсса ххуйсса давурттая, ва буциннав цала алжаннавусса багъирдавун. Жулагу ялтту учIаннав, журагу кьаритайни ва дуниял! Ва чIа тIий буру Аллагьнахь ихтияр дулун жухьхьунна жуярва хьхьичI ливтIусса диндалул уссурваврал-ссурваврал давурттив тIайла ду_ккан ва гайннал чIарав Алжаннаву бикIан.
Аллагьумма Амин!
Умукусум-хIажи,
ш. ЧIурттащи
