Июльданул 28-нний щалагу билаятрай кIицI ларгунни Аьрасатнал волейболданул кьини. Ва кьини 1923 шинал Москавлив хьуссар Аьрасатнаву цалчинсса волейболданул матч.
ВаницIун бавхIуну, вай гьантрай МахIачкъалалив, хьхьирил зуманив, лахъа-хъунну хьунни Дагъусттаннал цIанихсса волейболист Нуруллагь Оьмаровлун хас дурсса ттуплий буккаврил турнир.
Андриана Аьбдуллаева
Ванил сакиншинначитал хьунни мюрщиний Нуруллагь кумирну ивкIсса ххаллилсса лакрал чиваркI. Турнирданий гьуртту хьунни хъаннил ва арамтурал командартту, аьмну 6 команда. Командартту дия личIи-личIисса миллатирттал ттуплий буккултрая сакин хьусса. Арамтуралгу, хъаннилгу командарттаву хьхьичIунсса кIанттурду бувгьуминнун буллунни кубокру ва арцуйнусса бахшишру. Кубокру ва бахшишру дия мукунна яла гужма нападающийнангу, яла гужма защитникнангу, яла ягинма болельщикнангу.
Турнир хьунни лавайсса даражалий, Нуруллагь Бадруттиновичлул цIанин лайкьну. Рязину ливчIунни гьурттучиталгу, болельщиктал ва сакиншинначиталгу.
– Ттун Нуруллагь кIулну 15 шинни. Хьхьирий кIул хьуссару, ччяни цаннан ца бувчIунну. Уттигу гьарца кIюрххил хьхьирий хьунабакьайссару. Хьхьирийн бувкIминнаву ва къакIулсса чансса бикIай, хъуниминнавугу, жагьилминнавугу. Ванахьсса ссалам-калам ляличIисса бикIай. Ттун тIааьнну бикIай жула лаккучув укун хIурмат буну ушиврия. Жагьилний диркIсса сий уттигу хъисрагу чанну дакъар. Му исват бунни ванан хас дурсса турнирданулгу. Барчаллагьри ванал арсурвавран, хIакин Исмяил Аьлиев бакIчисса, турнирданул сакиншинначитал хьусса, лакрал жагьилсса арамтуран.
ЧIалай бур тай шиннардий Нуруллагь кумирну ивкIсса оьрчIая ххаллилсса инсантал бувкшиву. Нуруллагь эбратну ивкIсса жагьилтал къабюхъайссия бяйкьин, оьккимунийн кIункIу хьун. Учин ччисса муври, цила чIумал Нуруллагьлул цIанилва тарбия буллай бивкIссар танийсса оьрчIру, ва эбрат хьуну, тIайласса ххуллийн, цIуллу-цIакьсса оьрмулийн кIункIу хъанай бивкIссар жагьилтал, – тIий ур Нуруллагьлул дус, ЧIяйннал шяравасса Загьиди Аьбидов.
ДакIнийн бутан, спортрал мастер Нуруллагь Оьмаровлул цIа 60-70 шиннардий бусалдаравун дагьну диркIссар. Ва ивкIссар Дагъусттаннал волейболданул цачIундур командалул капитанну, уклай ивкIссар РСФСР-нул цачIундур командалуву.
Нуруллагь Бадруттинович танийсса мюрщи оьрчIал ва жагьилтурал кумиръя, ванал цIа гьарнал зумув дикIайссия тIий буслан бикIай ва кIулми. Таний, Гъумук волейболданул тIуркIу бусса бавну, Нуруллагьлух буруган жагьилтал бучIайсса бивкIун бур циняв лагма щархъава. Ванан хас дурсса волейболданул турнирду Дагъусттаннай уттинингу цимилагу хьуссар, ттиния тихуннайгу хьунссар.
Ванал цIа личIантIиссар Дагъусттаннал спортрал тарихраву.
P.S. ХIурмат бусса дус, Нуруллагь. Аллагьнал буллусса оьрмулий цIуллуну, сагъну итаннав ина. Уттинин куна эбратну личIаннав цинявппагу лакрангу, дагъусттанлувтурангу.
Ина жун чан къааннав.
Вил хIурмат бусса дустал
