Дагъусттаннал БакIчи Сергей Меликовлул каялувшиннаралу Республикалул призыврал кампаниялул хIасиллу дуллалисса совещание хьунни.
Шикку гьуртту хьунни аьралий комиссариатирттал, прокуратуралул, ихтиярду дуруччай органнал ва республикалул ведомстварттал каялувчитал.
Совещаниелий гьуртту хьунни ЦIуссалакрал райондалул бакIчи МаматIи ХIамзатовгу. Совещаниелул лагрулий кIицI лавгунни интнил призыврал план Дагъусттаннал 100% щаллу дуршиву. Вания Республикалул БакIчинахь бувсунни ДР-лул аьралий комиссар Дайтбаг Мустапаевлул. Ванал мукунна кIицI ларгунни интнил призыв цила чIумал ва лавайсса даражалий щаллу дурсса районну. ХьхьичIун лирчуминнувух ЦIуссалакрал районгу дур.
Сергей Меликовлул барчаллагь увкунни кIицI ларгсса районнал каялувчитурахь ва тапшур бунни ххуйсса ккаккияртту чIалачIи дурсса военкомтуран наградартту дулаврил масъала ххалбигьин.
Совещаниелул лагрулий ихтилатру хьунни контрактру чирчуну аьралий операциялий гьуртту хьун нанисса Дагъусттаннал аьралитурая, миннал чувшиврия ва Ватан ххирашиврия.
