Июльданул 25-нний МахIачкъалалий хьунни Дагъусттаннал цIуллу-сагъшиву дуруччаврил сфералуву зузисса жагьилсса пишакартурал масъалартту кIицI лаглагисса пресс-конференция.

Пресс-конференциялул спикерталну бия АьФ-лул ЦIуллу-сагъшиву дуруччаврил зузалтрал профсоюзирттал хъунмур комитетрал председатель Домников Анатолий Иванович, Дагъусттаннал региондалийсса ЦIуллу-сагъшиву дуруччаврил зузалтрал профсоюзрал комитетрал хъунмур, «Единая Россия» партиялул член, региондалийсса «Здоровое будущее» партпроектрал координатор Бучаева Зумруд Камиловна.

Анатолий Домниковлул бувсуна июльданул 24-25-нний МахIачкъалалий Аьрасатнал цIуллу-сагъшиву дуруччаврил зузалтрал профсоюзирттал жагьилсса пишакартуран маслихIатру ккаклакисса ва миннал даврил даража гьаз баву мурадрайсса семинар-тренинг дуршиву.
Семинарданий гьуртту хьу­ссар Кьиблалул ва Ухссавнил Ккавкказуллал федерал округрайсса жагьилсса хIакинтурал профсоюзру. Дурссар жагьил­сса хIакинтурансса «Будь в теме», «Продвижение профсоюзной информации в социальных сетях» тIисса цIардалусса тренингру.

Анатолий Домниковлул кIицI лавгуна хIакьинусса кьини билаятрай социал хIала-гьурттушиврул ишру хьхьичIунмай хъанай бушиву. Билаятрал даражалийсса социал кьутIирду дуллай бушиву АьФ-лул ХIукуматращал, профсоюзирттащал ва давурттал дузал буллалиминнащал.

Профсоюзирттавух хIала бувхсса жагьилсса пишакартуран хъунмасса кумаг хьунтIиссар чIяву-чIявусса масъалартту дузрайн буккан бавриву.
Республикалул цIуллу-сагъ­шиву дуруччаврил зузалтрал профсоюзирттал щархъаву зун гьан ччисса жагьилсса хIакинтуран ци кумаг буллай буссарив бувсунни Зумруд Бучаевал. Ванил бусаврийну, ДР-лул Халкьуннал Мажлисрал заседаниярттай цимилгу гьаз бувну бур щархъаву зун бувкIсса жагьилсса хIакинтуран аьрщи итадакьаврил масъала. Республикалул 11-хъул муниципалитетирттай щаллу бан бювхъуну бур ва масъала.

– «Земский доктор» программалул лагрулий щархъаву зун лавгсса гьарцагу хIакиннал даврин кьимат бищун ккаккан бувну буссар хасъсса насихIатчитал. Программалул лагрулий кка­ккан дурсса 5 шин ларгун махъ, медработникнаща ххишаласса кIулшивуртту ласун бюхълай бур цIуллу-сагъшиву дуруччаврил идарарттай. ХIакьинусса кьини шяраваллал кIанттурдай медициналул идарартту чIявусса бунугу, биялсса кадрарду бакъашиву асар хъанай бур, – увкуна Зумруд Бучаевал.
Пресс-конференциялий гьуртту хьуминнал цIюрувкьусса масъалану кIицI лавгунни щархъаву зун гьан ччисса кадрарду бакъашиву.
Ахирданий, Анатолий Домниковлул ва Зумруд Бучаевал жавабру дуллуна журналистътурал суаллахьхьун.