Гьашину Москавлив РМАНПО-лул (Российская Медицинская академия непрерывного профессионального образования) ординатура лавайсса кьиматирттай къуртал бувну, ЯтIул диплом лавсунни жул зузала Андриана Аьбдуллаевал арс Аьбдул Мисрихановлул. Жула коллегахь барчагу тIий, кутIану бусанну Аьбдуллуя.
Увну ур ва 1996-ку шинал сентябрь зурул 21-нний Бархъаратусса Аьлил ва Ккурклиясса Андрианал кулпатраву. ХIакиннал пиша Аьбдуллун школалий дуклакинийва ххуй бизлай бивкIун бур. 2014 шинал МахIачкъалаллал №28 школагу къуртал бувну, увххун ур Дагъусттаннал медициналул университетрал лечебный факультетрайн. Дуклай унува, зий ивкIун ур Н.М. Кураевлул цIанийсса Республикалул оьрчIал чIяру профиллу дусса азарханалий, реанимациялул отделениялий. Щалагу дунияллий коронавирусрал инфекция сукку хьусса чIумал, 6-мур курсрай дуклакисса Аьбдул зий ивкIун ур ковид-госпиталлай ЯтIул зоналий.
ЗахIматсса, цала оьрмулун ва цIуллушиврун нигьачIаву дусса шартIирдай зий бивхьусса захIматрахлу лайкь хьуну ур Дагъусттаннал БакIчи В. Васильевлул чулухасса Барчаллагьрал чагъарданун. Дуккаву къуртал дурну махъ ца шинай Аьбдул зий ивкIун ур Москавуллал областьрайсса Красногорск шагьрулул поликлиникалий.
Ца шинава цала хIарачатрайну увххун ур РМАНПО-лул бюджетрал ординатуралувун, офтальмологиялул отделениялийн.
Дуклай унува, зий ивкIун ур Москавуллал ЦIуллу-сагъшиву дуруччаврил департаментрал №45 поликлиникалий.
Шиккусса ккаккиярттахлу лайкь бувну бур Москавуллал мэр С. Собяниннул чулухасса Барчаллагьрал чагъар. Цала язи бувгьусса пиша куртIну лахьлай, Аьбдул занай ивкIун ур С.П. Боткиннул цIанийсса азарханалийн. Шикку канилух дурккун дур хирургиялул практикагу. Дежурстварттай ва чIявуну хьунаакьайсса ивкIун ур экстренный иширттащал. С.П. Боткиннул азарханалий ванал кIулшивурттугу хъиннура куртI хьуну дур, давугу канилух дурккун дур. Щак бакъар, цала пиша ххирасса ва жаваблувшинна дусса жагьилсса хIакинная, ванал хьхьичIуннайшивурттая жунма уттигу балланшиврий.
