Хъунмасса тIайлабацIулущал хьунни итникьини Пятигорскалий Расул ХIамзатовлул 100 шинал юбилейран хас дурсса Лакрал театрданул гастроллу.
Ккаккан бунни спектакль «Последняя цена».
Спектакльданийн оьвкуну бия Донецкаллал ва Луганскаллал республикарттаясса, Херсоннал областьраясса лихъачалтрайн, хасъсса аьралий операциялий гьуртту хъанахъиминнал гъан-маччаминнайн.
Тамашачитал барчаллагьрай бия артистътурайн, ччя-ччяни булухьхьияра тIий.
Гастроллал лагрулий М. Горькийл цIанийсса библиотекалий хьунни пресс-конференциягу. Муний театрданул директор МахIаммад ХIусайновлул бувсунни театрданул тарихрая, репертуардания. Артистътурал Руслан Лариннул ва Артур Абачараевлул бувсунни Санкт-Петербурграясса режиссер Дмитрий Павловлущал спектакльданийн хIадур хъанахъиссаксса чIумул дянив цала пишакаршиврул даража ккалли банну лавай хьушиву.
Спектакль уттинин ккаккан бувссар Грозный, Владикавказ, Нальчик ва Элиста шагьрурдай.
Сентябрьданий спектакль ккаккан бантIиссар Саранск шагьрулий хьунтIисса «Театральная осень» фестивальданий, миччава гьантIиссар Казань шагьрулийн гастроллайгу.
Тамашачитуравасса ца Надежда бувкIун бия спектакльданийн санаториялий игьалаглай ивкIсса чIумал Расул ХIамзатовлул, цала къулбасгу дурну, пишкаш бувсса лугу лавсун.
ДакIнийн бивчунни Расул ХIамзатов ва ванал кулпат ПатIимат.
