Ххуллункьини, кIюрххила, Гъумук дия ил бавтIсса уттарашинна. Шагьрурдаягу бувкIун бия биялсса хъамал.
Ва уттарашинна цурдагу дия Гъумукун Совет Союзрал Виричу, летчик- космонавт Муса Маннаров учIаврил савлугърансса.
[dropcap]Р[/dropcap]айондалул дуклаки оьрчIру, магьирлугърал зузалт миллатрал яннардаву бувккуна, Муса Маннаров цалчин, аьламрава зана хьуну, Гъумукун увкIсса базилух райондалул агьалинал каширдацIух бувну, миллатрал язисса арснан буллуну бивкIсса къатлучIан. Муса Маннаровлул тIурча, ва къатта буллуну бивкIссар райондалухьхьун. КIайннуву бувссар Муса Маннаровлул цIанийсса музей.
Райондалул бакIчи Юсуп МахIаммадовлул ва ДР-лул Культуралул министерствалул кабакьаврицIух музейрал къатри цил багьайкун цIу дуккан дурссар. Ва иш сававссая ххуллункьини Гьумук хьусса шадлугъгу.
Муса Маннаров хьунаакьин бувкIсса бусравсса хъамаллуравух бия: ДР-лул культуралул министр Зарема Буттаева, ДР-лул Халкьуннал Мажлисрал депутат Марат Илиясов, космосрал аьралуннал полковник Аслан Маматиев, 1988 шиналсса Олимпий тIуркIурдал призер Эдуард Собич.
[dropcap]Ю[/dropcap]суп МахIаммадовлул, хъамаллурахь чабувкругу куну, кIицI лавгунни райондалий хъанахъисса иширал агьамшиву. Ихтилатру бунни Зарема Буттаевал, Марат Илиясовлул.
Муса Маннаровлул барчаллагь увкунни райондалул агьалинахь, бувкIсса хъамаллурахь, музей цIу буккан баврил ялув захIмат бивхьуминнахь.
Муния махъ хъамаллурайн оьвкуна музейрал экспозициярттащал кIул бан. Музейрал хьхьичI хьунни Гъумучиял Магьирлугърал школалул дуклаки оьрчIал ва райондалул магьирлугърал къатлул зузалтрал хIадур дурсса концерт.
Хъамаллурал ххал бунни Виричунан хас бувсса мурцIу. Миккусса стендрай Муса Маннаровлул кьариртунни къулбас, «Дуклакияра ххювардай» тIисса чичругу дурну.
