Ларгсса алхIаткьини Ххюлуссуннал шяраву хьунни ххарисса иш – шагьрурдаягу чIявусса ил бувкIун, шяраваллил агьлу бавтIун бия хасъсса аьралий операция нанисса кIанттава игьалаган увкIсса Сабир ХIусайниев хьунаакьин.

[dropcap]М[/dropcap]у иширан хас дурсса митинг хьунни Буттал КIанттул цIанийсса Хъун дяъвилия зана къавхьуминнан дацIан дурсса гьайкалданучIа.
Аьраличунахь аврав увкунни ванал гъанчув Мусаннип Исяевлул, шяраваллил бакIчи ХIажимурад Акаевлул, захIматрал ветеран Илияс ХIадисовлул, «Ттул Ххюлуссун» тIисса Жагьилтурал фондрал каялувчи Аздар МихIадовлул, Лаюса Исяевал, ФАП-рал хъунмур Жамила Къунжуевал ва цайминнал.

Сабир ХIусайниевлул барчаллагь увкунни шяравучутурахь хьунабакьаву сакин даврихлугу, аьрай талатиминнал чIарав бацIлай бушиврухлугу. Бувсунни аьралий къуллугърая, тикку­сса шартIирдая, аьралий гьалмахтурая, хасъсса аьралий операция байбивхьусса гьантрай цанна ккарксса захIматшивурттая.
Муния махъ шяраваллил клубраву тIивтIуну бия къучагъсса талаталал савлугърансса ссупра.

[dropcap]Ч[/dropcap]увнал бурж иш багьний ватандалухлу жан дулун хIадурну ушивур, тIий ур чумартсса ппухълуннал эбратрай тарбия хьусса Сабир. Ванал буттал ппу ХIусайнигу цалчинминнавух лавгун ивкIун ур, Буттал КIанттул цIанийсса Хъун дяъви байбишайхту, душманная ватан дуруччин. Ппу ХIажи-Ися гьуртту хьуну ур Чернобыллал АЭС-рай хьусса апатIрал зараллу бухлаган бавриву. ХIакьину хасъсса аьралий операциялий ватандалул ххуллий цала бурж биттур буллай бур ванал ссурахъал: Заур ХIусайниев, ХIажимурад ва Загьиди Акаевхъул, гъанчув Шамил Аьлишаев.

Цаппара гьантрава Сабир зана хьунтIий ур махъунай. Ва къуллугъ буллалисса аьралий часть дирхьуну дур Запорожскаллал областьрай.
Шяравучутал барчаллагьрай бур Сабирдуйн ва ванал ссурахъаврайн, жард къакуну, бивкIулийн лажинну бавцIуну, цала чувшиврул ва аьраличунал бурж биттур буллай тIий. Дуаьрттай бур ччясса мутталий сагъну-саламатну ххувшаврищал занахьуннав тIий!