Щин дутIаврия
Дайдихьу №20
Ххуйсса бакIлахъия ласавриву агьамсса кIану бугьлай бур дургьумунийн щин дуртIусса куццул. Щин чан хьурча, чIапIив кIура-кIура баллан, щюллимур хъахъи лаглан, тIутIайх дирчумур зизлан дикIай. ЧIяру хьурчангу, мархри аьллай байбишай, хьусса ахънилссагу щинаталайсса дикIай.
Аьркинссарив
дургьумунийн гъарая махъ щин дутIин?
Шикку гъарах цихва бурган аьркинссар: агарда гъарал паракьатсса ва хъунмасса хIаллайсса диркIхьурча, дургьумур щинал диялну дурччуссар. Агана кутIасса чIумуйсса ва анаварсса диркIхьурча, мархрачIан щин дияврил бази чанни. Дирдивав, къадирдивав тIий, кIихIуллану бухьурча, ларсун кьаркьсса тIама, куртIну аьрщаравун кьутIара – чIяруми ххяххиярттал мархри 15-30 см. куртIшиврий бикIайссар.
Мурхьирдайннив, цIуну бувгьуминнуйн дикIу, бувгьуну шинну хьуминнуйн дикIу, щин дутIа-къадутIавриву гъарах буруглан къааьркинссар: хъинну лахъи ларгсса гъаралуннил бакъа, гьарца мурхьиран аьркинсса 4-5 бадра щинал биял къабайссар.
Цуксса чIярунур щин дихьлан
аьркинсса?
Ва даву дуван аьркинссар дунияллул тагьарданух, дургьумунил чIумух бурувгун. Масалдаран, цIуну дургьусса рассадалийн гьарца кьини аьркинссар щин дутIлан. Вайннул мархри цIакь хьуну, тавтун мукьахрив – кIива-шанма гьантлий цал мархрачIан диянну ххуйну дуртIусса щин гьассар.
Ялагу дакIний битира, къун хIаласса куклусса аьрщи хъатрулуцIа ччяни шайшиву кIусса, гьагъ хIаласса аьрщинияр.
Щин къадуртIуну
гьантри лавгхьурча
Агана зува ахъувун, дачалийн най, биян къашавай, ахиргу бивну, дургьумур дачIи кьаркьун, хъахъи лаглай ляркъухьурча, щин чан-чанну ва кIил-шамил дишара, тиха-шиха экьикъаларгун, мархрачIан диянну, цал дирхьуми ххуйну дюкьан диртун, ялагу мукунна цал-кIил дихьлай, кьакьлай байбивхьусса мархри щинал буччин бувну, ххассал баншиврул.
Яла хъинмур щин – хьхьу-кьини гьантта дикIан диртмурди
Ваниннингу кIицI лавгсса куццуй, кIири ларгсса ххяххиярттайн чюхлиласса дяркъусса щин, бюхъавай, къадуртIуну хъинссар, температура цакуну даххана шаврия дургьумунин зарал буссар. Бочка, ванна ягу хъуннасса цамур зат дурцIуну, щин хьхьу-кьини диртун хъинссар.
Гихунмайгу буссар
ХIадур бувссар
Бадрижамал Аьлиевал
