Дунияллул халкьуннал дянивсса динийсса форумрал хъамал бавтIунни С. Башларовлул цIанийсса медициналул колледжравун, форумрал церемониялий гьуртту хьуншиврул. Ва церемониялул дайдихьу дуллалисса махъ лавхъунни форумрал директор АсхIабаьли Мурзаевлул. Хъамаллурахь барчаллагь тIий, ванал кIицI лавгунни гьашинумур форумрал география гьарза-гьарта хьушиву, Аьрасатнал цайми регионная бакъа, кьатIаллил билаятирттаягу тамансса хъамал бувкIшиву.
— Агарда ва форум, чIявусса миллатру ва личIи-личIисса диннал агьлу яхъанахъисса Дагъусттаннай къавхьуну, цамур кIанттай хьуния, му хьунссия тамаша бизанмурну.
Ва дунияллий гьарзатрал цилла чIун дуссар, гьарзат духдуккайссар, личIайссар так хъинсса дакIурдил чани. Ва форумралгу инсантурал дакIурдиву хъиншиврул гьанна ппив буллалиссар, – увкунни миллатрал политикалул ва динийсса иширттал министр Энрик Муслимовлул.
Вара тема гихуннай аьч дуллай, Мурзаевлулгу ххи бунни: «Билаятирттал ва мазурдил дуссар дазурду, дакIурдилли дазурду дакъасса». Ихтилатру бувна Кисловодскаллал раввин Алексей Худайнатовлул, ягьудинал культуралул, кIулшивуртту дулаврил ва элмулул фондрал председатель Михаил Черновлул, Къалмухънал вакил Сергей Киришовлул, Луганскаллал Халкьуннал Республикалул делегациялул каялувчи, архимандрит Макарийл.
Вайннал кIицI лавгуна жагьилтурал форумрая циняв кIулшивуртту куртIгу, цIакьгу дурну гьантIишиву. Ахирданий, форумрал лагрулий хьусса спортрал ва цаймигу журалул бяст-ччаллил мероприятиярттай хьхьичIун ливчуминнан бахшишру дуллуна.
