Аьрасатнал жагьилтурал хоккейрал лигалул тIуркIулувасса лахIза соцсетирдаву бакIрайн багьну, муних буруглай бунува, комментаторнал зумату кIулсса фамилия баяйхту, дакIнивун ца илгьан багьунни – ХIусниев. Хъусращиялгу дур ва фамилия, гъумучиялгу дур, бюхъай цайми шяраваллал ва миллатиртталгу дикIан. Амма, циваннив, дакI хьулданий дия хоккейраву уклакисса оьрчI Хъусращатусса ушиврий.
Ци къаикIави!? ДакIнил бусласимур хIакьсса лявкъунни! Амирхан Х1усниев тIисса цIа чичайхтура интернетраву бувккунни ванаятусса информация, цалсса хъинну кутIасса бухьурчагу, ттунма кIул бан ччай бивкIсса. Хар-хавар бакъассагу, тIааьнссагу цIусса хавар – «лаккучу-хоккеист»! ХIакьинунин жуна къакIулли спортрал ва журалул тIуркIулуву уклакисса дагъусттанчув.
Аьрасатнал жагьилтурал хоккейрал лигалул гьужумчи ацIния арулла шинал оьрмулувусса Амирхан ХIусниев лявкъунни, ттула шяравучу ушивруцIун, архсса гъанчугу. ХIусниев Аьвдуллагь Валиевичлул арс. Буккултрангу дакIнийн агьхьунссар. 1998 шинал тайский боксраву Европанал чемпион хьусса. Дунияллул халкьуннал классрал мастер спорта. Аьрасатнал шамийла чемпион (пишакартурал дянив), 1998 шиналсса ккаккиярттайн бувну, тайский боксрал Аьрасатнал яла хьхьичIунма ию. Зий ивкIссар «Скорпион» спортшколалул тренерну.
Амирхан ХIусниевлул къуртал бувну бур И.Б. Дмитриевлул цIанийсса хоккейрал школа «Крылья Советов».
ЧIа учинну жула чIавасса хоккеистнан олимпий чемпион хьунсса, НХЛ-данул даражалийн иянсса тIайлабацIу. На тIурча, хIарачат банна Амирханнуя, балжину кIулгу бувну, зухь бусан.
