Ттигъанну на ттула «Телеграм-каналданий» хоккеист Амирхан ХIусниевлуясса пост бивхьуну мутта къалавгун, мира соцсетирдай итталун дагьунни ца цамургу видео – Волгоградуллал областьрал чIаважагьилтурал дянивсса микIирай бигьаврил первенствалия. Комментаторнал баян бунни: «МикIирайн буккантIиссар Амира Къапланова. Вольжск». Вагь! Ва жула Мурадлул душвагу бакъарвав? Вольжск шагьрулий ялапар хъанай уссар жула Шамсуттин Къаплановлул чIавама уссу Мурад.

Мяйжаннугу, Амира лявкъунни танал душ. ЦIана Амиран дур ацIния кIира шин. МикIирайн буклай бур чIаважагьилтурал бяст-ччаллай.

Жува, махъ бакъа, ххари ша­ру чув-бунугу жула ватанлувтурал гьунарду ялун ливчукун. Амма нитти-буттан ччан къабикIай цала оьрчIал гьунарду биялну итххяхханнин, ци-ду­нугу хьхьичIуннайшиву хьуннин буслан. Ялугьланну жувагу, Амиран тIайлабацIугу чIа тIий. Лабизланну, хъуни-хъунисса хьхьичIуннайшивурттайн бияннав тIий жула Амира!
Амира шамилчинсса инсан хъанай бур Дагъусттанная ва журалул спортрал тIуркIулуву буклакисса. КIинная жу балжину бувсъссия ччянива.

Бадри Курашвили (Бадруттин КьурбанмахIаммадов), Гуржиянаву хъуна хьусса яруоьрчI, ЧIарадиял райондалиясса, ни­ттил нину Уриннал шяравату­ссар тIива ванал уссил. ЦIанакул ялапар хъанай усса ур Германиянаву.

ДакIнийн утанну Мурад Кьурбановгу, дунияллул чIава­жагьилтурал дянивсса Гран-Прилул чемпион. Москавлив угу-увну, хъунагу хьусса Хъусращиял шяраватусса оьрчI. Спортрал карьера мукунсса зат дур, 99 % захIматрал, бувагу 1% тIайлабацIулия хъар хъанахъисса. ТIайлабацIулунсса дайшишругу чIяруну пишакаршиврул гьагъ сававну шайсса. Гьарцанналсса чулийн къабуккай захIматгу, умудгу. ЦIанакул Мурад зий уссар тренерну. Цанма къавхьусса тIайлабацIу вардиш буллалиминнан хьуннав, тренерналмур давриву кабакьиннав!