Гъинттулсса каникуллу дайдирхьусса гьантрай Дагъусттаннал цинявппагу шагьрурдайсса ва районнайсса мизитирттаву тIивтIунни оьрчIан Кьуран буккин, чак бан лахьхьин буллалисса уквасса курсру. Му бакъассагу, вай курсирдай оьрчIахь буллантIиссар нитти-буттал, хъуниминнал ва лагма-ялттуминнал чулухунмай хIурмат-кьиматрай бикIансса насихIатру. Курсру тIивтIунни ДР-лул Муфтиятрал ва «Инсан» тIисса ихIсандалул фондрал сипталийну.

[dropcap]И[/dropcap]юнь зурул 5-нний шадлугърал даражалий тIивтIунни вай курсру МахIачкъалаллал Хъун мизитравугу. Цалчинсса кьини курсирдайн бувкIсса оьрчIайх бавчIунни нацIу-кьацIулущалсса кьуцуртту, мороженое. Дурккунни нашидру, лавхъунни махъру, дунни исламрал кIулшивуртту аьч дуллали­сса викторина. ТIайласса жавабру дуллуминнан дуллунни бахшишру.

[dropcap]В[/dropcap]ай курсру зунтIиссар июньдалул 5-нния августрал 15-ннийн бияннин нюжмардий 5 кьини. БайбишинтIиссар курсру ссят 9-нний. Шанма зурул мутталий оьрчIан лахьхьин бантIиссар тIайлану чак буллан, Кьуран ккалан. Курсирдайн кьамул бантIиссар 7 шиная тийнмайсса оьрчIру ва душру. Ххуйри гьакссагу, шаппа оьнма бикIаяр, мюнпат бусса курсру жула оьрчIангу тIивтIуну.