[dropcap]О[/dropcap]ьрчIру буруччай кьини МахIачкъалалив «Инт» кафелуву ятин­сса оьрчIансса ва аьралий иширттаву гьуртту хъанахъиминнал кулпатирттансса мероприятие дунни. Ва даврил сиптачиталгу бия «Опора России» ДРО-лул каялувчи Зульгимар Тагибова-Ричинская ва «Забида» тIисса риелтортурал коллегия ООО-лул гендиректор, жяматийсса ишккакку, 1-мур ЦIувкIратусса Забидат Аьбдуллаева. Ва кафелул хъунмур Саидат Кьурбановащал уртакьну оьрчIансса ххуйсса программа хIадур дурну дия. ОьрчIал гъирарай миллатрал лаххия цайра цукун даркьуну дурив ххал дурна, хъамакъабитулун суратру рирщуна, Да­гъусттаннал агьалинал дукрардая цIусса затру кIул бувна.

[dropcap]Б[/dropcap]автIцири шад буван лях-карах балайрду увкуна балайчи Залиххал. Ва мероприятиялий гьуртту хьуна Дагъусттаннал БакIчи Сергей Меликовлул кумагчи АхIмад Аьбдуразакьов, ванала маслихIатчи Зарема МахIаммадова. Вайннал цала ихтилатирттаву барчаллагь увкуна ва къабигьасса ппурттуву ятинсса оьрчIах ва СВО-лий талатиминнал кулпатирттах къулагъас дуван бакIрайнласу бувминнахь.

«На мудангу хIадурссара оьрчIан ххарисса, чаннасса лахIзарду пишкаш буллалисса давурттал чIарав бацIан, ка кIидахIин. Укунсса мероприятиярттайну жува ккаккан дуллалиссару оьрчIахсса ччаву, миннахасса аякьа.

[dropcap]Э[/dropcap]тнокафелул хъунмур Саидат Дундаровнал миллатрал лаххия дуллунни цила коллекциялува, оьрчIал суратру рищуншиврул, шайкун хIала бувххунни, барчаллагьри ванингу. Барчаллагьри, тачIав дакIхъуншиву къадурну, чIун дур-дакъар къакуну, укунсса иширттал чIарав бацIан бучIайсса балайчи Залиххангу. Ва кьини кафелувун бувкIцири ссайгъатирттащал ххарину, рязину лавгунни.