Гъумук най дур «Жагьилтурал парк» гьарза-гьарта буллалисса давуртту. Ва парк бувссар 2018 шинал «Единая Россия» партиялул щурущи дурсса, агьали батIайсса кIанттурдай къулайсса шартIру дузал даврил программалул лагрулий.
[dropcap]Я[/dropcap]лтту чулийнмай БурхIай-Къалалийн, лултту чулийнмай ВацIилу-Зунттуйн бурувгсса кIанттай бивхьусса парк Гъумучиял агьулданунгу, лагма щархъая бувкIминнангу ца яла ххирамур кIануну хьунни. Кьинибархан ябатIин къашайсса сурат дикIай шичча ВацIилу- Зунттул. Чани хъяхъачавривун ВацIилу буссар зунзулчаннавун бахьлавгун, лагабургъицIун тIурча, ВацIилу буссар мусивун щусса кунма чIалай. Барзгу ВацIилул бакIрахар буккайсса. Ца ххирарча ттунмагу, ва паркравун бувкIун, зурул чанна лахъан бувсса ВацIилу-Зунттуй зияратрай, лултту чулийх нанисса неххал чIунихгу вичIилий, щябикIан.
Зунмагу бувчIухьунссар лагмара укун караматсса чIалачIин дусса паркравун сайрданий чансса ил къабатIайшиву. Хаснува цIана, туристъталгу жучIанма бурувгсса чIумал.
Райондалул администрациялун пикри хьунни, ва парк гьарза-гьарта бансса мурадрай, «КIанттул сиптарду» тIисса программалий гьуртту хьуну, цIусса давуртту дансса каширду лякъин. ЦIана кIикку дакьлай бур ххялчIив. Давуртту къуртал дан дакIний бур шинал ахирданийннин. Муния махъ дакIний бур мурхьру бугьан, скамейкарду ххи бан.
