[dropcap]О[/dropcap]ьрчIру буруччаврил кьини МахIачкъалалив Ипподром микрорайондалий оьрчIансса цIусса садик (№ 36) тIитIлатIисса шадлугъ хьунни. Ваний гьуртту хьунни Дагъусттаннал БакIчи Сергей Меликов, Аьрасатнал просвещениялул министрнал хъиривчу Андрей Николаев, Аьрасатнал Обороналул министерствалул строительствалул управлениялул хъунама Астемир Абаев, республикалул кIулшивуртту дулаврил ва элмулул министр ЯхIия Бучаев, МахIачкъалаллал мэр Юсуп Умавов ва Халкьуннал Мажлисрал депутатътал.

«ХIакьину Аьрасатнаву цIу­сса 11 садик тIитIлай бу­ссар, вайннувату 6 садик – Да­гъус­ттаннай. Гьунттиния тийнмай вай цIуну тIивтIусса садикирттавун занантIиссар 950 оьрчI. Ва шин къуртал хьуннин рес­публикалий кIулшивуртту дуллалисса 50 учреждение ттигу тIитIинтIиссар, Дагъусттаннал оьрчIру ва нину-ппу ххари хьунсса ишру ялугьлай буссар», – увкунни Сергей Меликовлул.

Андрей Николаевлул кIицI лавгунни, ОьрчIру буруччаврил кьини цIусса садикру тIитI­латIаву хIисаврайн ласун­сса иш бушиву. Ва садик 200 оьрчIансса бур.
Вара кьини Фонвизиннул цIанийсса кIичIираву тя­хъасса цIагу дусса, «Колобок» тIисса садик (№60) тIивтIунни. Шадлугърай гьуртту хьунни республикалул премьер-министр Аьбдулмуслим Аьбдулмуслимов. Ва 60 оьрчIансса садик бур. Республикалий вара кьини тIивтIуссар цаймигу садикру: Хасавюртлив – 200 оьрчIансса, Буйнакскалий – 250 оьрчIансса, Чапур-Гъумук –120 оьрчIансса, вайкссава оьрчIансса Ботаюртливгу. Вай циняв садикру бувну бур «Демография» тIисса национал проектрал лагрулий.