АбутIалиб Гъапуров

Щавурду хъин данну

ДакIурдива бувккун
Дяъвилул пикри,
Даврийн дирину дур
Халкьуннал ликри.

Дардру ва буруккинт
Берлиннайн лавгун,
Шадлугъ ва тирхханну
Тархъанний лирчIри.

«Зулмукарнал ахир
Оьнийн дуккайссар», –
Ччянива куссия
На балайлуву.

«Оьсса ттуккун гьиву
КIусса лякъайссар», –
Ччянива куссия
На къумузрахун.

Ибрагьим-Халил Кьурбанаьлиев

* * *
Ай,оьрму ккавкссия ттун ва дунъяллий,
Та Лайлащал нара ччаву дачIайни,
Амма оьрму бия ттун дунияллий:
Дяъвилий душманнал хьхьичI авцIу кьини,
Ялун гьужум бувну, душман нанийни,
Лагмава ккуллардал ттугъ бизлазийни,
Цинявппа гьалмахтал ттуя арх хьуни,
Душман ялун ххявххун чIарав нанийни,
НякI чIутIул ккулла на дакIнин булайни.
Агь, вана ва бия оьрмулул неъмат,
Маслакирал ялув къия духIайни.

Юсуп Хаппалаев

Нажагь хилип хьурча

Нажагь хилип хьурча,
Ватан, ттул дакI вийн,
НякI ссав буркIна хьувча
Ттун сагъну уна!

Нажагь, аьзиз дустал,
Зу кьабитарча,
Сиччин сукку хьувча
Ттув оь дардирдал!

Нажагь миллат ва халкь
Хъамабитарча,
Халкьуннал нааьна
Ттун сурув хьувча!

На вихра хIакьмунийн,
Ччаврийн, дусшиврийн,
Миллатрайн, халкьуннайн,
Жува ххув шаврийн!

Абакар Мудунов

Аьрая къаувкIсса арснан

ХIавигу хIав кьавкьунни,
Вил яругу лавкьунни
Абадлий къатIитIинну.
Мукьал хъювхъу бувавай,
ДакIнийх бурса бакьавай,
Арс, циван кьабитав жу
АршилуцIух цIу щуну?
«Бава буттайн аманат,
Бутта Заннайн аманат,
Кьанчуллалу къукъухьхьи
ЧIава уссийн аманат», –
СсихIирачIан ивукун,
Аманатвагу ци бав?
Кьадиртун зунттал хъачIну
ЖучIа вила гьайбатгу,
Лавгссарав, акъассарав,
Ай, жул ца акъа-акъуй?
ЛивчIунну маз бувхIуну.
Зума цукун учиви:
Хьувча винсса гьайкалну
Жул дакIнил аьсившиву.

Салимат Кьурбанова

Ттигу ялугьлай ур

Лавгмур дакIнийн багьувкун,
ДакIния парча багьай,
ОьрчIал ппу цIувххутарив
Базурдайх бурса бакьай.

Увссия на ттуна арс,
ЧIа куну, мурадиран,
Бутталгу бувна хъатIи,
Бивххуну бархху кугу.

Амма буттахь ттул арснал
Цал «мяммай» къаувкуссар,
Увну кIива барз хьуннин
Ппугу дяъвилийн лавгссар.

Янна-ярагъгу лавххун,
Аьрайн нанисса кьини
Цимилгу зана хьуна
Хьулувату махъунай.

Гьарца зана хьутарив,
КIанттувун уругайва,
ОьрчIгу ия лап аьтIий,
Кьаагьан ан къахъанай.

ЧIалай диявав оьрчIан
Буттайн дуккансса кьини,
Ххишала цахва урган
Зана къаикIайшиву?

Ппу зана икIанссар тIий,
ОьрчI ттигу ур уруглай,
Цува ппу хьуну уна,
Ттигу умуд къакьукьлай.

Цаннивав чIиви оьрчIан
Дуллусса укунсса дард,
ЧIири кIяла хьурчангу,
ДакIния къалагайсса.

Лавгмур дакIнийн багьувкун
ДакIния парча багьай,
ОьрчIал ппу цIувххутарив
Базурдайх бурса бакьай.

Мирза МахIанмадов

Арснахь

Уссияв душманнащал
Дяъвилий нагу талай,
Кьини дурккусса чIумал,
Буттал кIану буручлай.
КIусса щаву дирнугу,
Дакъая къюву дуллай,
Къюву дия дакIниву,
Халкьуннал хIасрат чIалай.

Ттул кьастгу дакъассия
Дяъвилий цIа дуккан дан,
Амма ттул кьаст дуссия
Буттахъал намус ябан.
Дакъанугу хъазамрай
Гьунарданул лишанну,
Чансса дакъар ттул чурххай
Чулу щавурдал аьшру.

Ккуллалулгу кув литIай,
Кувннайгу щавурду дай,
ИкъавкIуну личIангу
КъаивкIссара лаикIлай.

ЛивтIуминначIан нагу
ГьантIиссара махъунай,
Ява, арс, цIакьну ацIу,
На куна, ттул аьрщарай.

ЦIа дуккан дан, цIанихлу
Талангу гьаз машара,
Халкьуннал дард-хIасратгу
Хъамаритан мадара.
Дакъанугу хъазамрай
Гьунарданул лишанну,
Гьассар, духьурча чурххай
Чулу щавурдал аьшру.

Абачара ХIусайнаев

Ххуллухъин

Поездрал чIавахьулттийх
Ттул ччисса ивхьуну ур,
Жагь ттух, жагь цала ниттих
Пиш-пиш тIий ялугьлай ур.

Ур батIул дан къашавай
ДакI аьзизсса ниттия,
Ур батIин къабюхъавай
Яруми ччисса ттуя.

ТтютI увкунни нукIува,
Поезд хIаллих бавчунни,
ДакI дурккунни дикIува,
ХIаллих вищал дарчунни.

Ччисса жугу кьабивтун,
Насу Ватан дуруччин.
Насу, жул макьгу ларсун,
Вин, ххирама, ххуллухъин!

Жун ина – кIиннин цара:
Ниттин – арс, ттун – гьалмагъай.
Ява, хьхьара мадара
ЧувчIав, Ватан дуручлай.

Аьбдул Мирзаев

* * *
Ххуй душ, цанна ина макь рутIлатIисса?
АьтIун бикIайссарив укунсса кIанай?
Макь къарутIлай, къавтIун цан къабизара?
Макь къарутIлай, балай цан къаучара?
– КъавтIун изан уван ттущала жагьил
Щяпа бивщуссия на ца жагьилнайх,
Утти на бивчIаннав, ттун къакIулссия,
Га жагьил, га жагьил та Афгъаннава
Ца ччан багьну шавай увкIун ивкIшиву,
КъабучIан бакъаяв шиккун ва хъатIуйн,
Къабищун бакъаяв жагьилнайх щяпа…

Бадави Рамазанов

Аьрайн аьрххи

Ца чIумал, лачIа бувчIлай,
Буссияв щюлли къурув,
Ттун бия тIааьн бизлай
Ниттил тIутIисса махъру:

– Утти ттуйгу хIал бакъар
Къурнил, къатлулсса буллан.
Чара бакъа аьркинссар
Гьашину вин хъатIи бан.

МарцI лачIал чIали кунма,
Бивну бур гьалмахщаргу.
ЧIумувату ливчума
Уккайссар сийлувату.

Буттукьраву думургу
Жалиндалун дулунна,
Дакъамургу ду дурну,
Вил хъатIун харж дуванна.

Укунсса икьралданий
Къурату зана шайхту,
Къапулух, аь-къана тIий,
Жун ляркъуна буттарссу.

Циявхьур, лухIи душман
Ххявххун ур тIива жуйна…
Дуруччин аьзиз Ватан,
Аьрайн ачин багьуна.

ЧIали кунна, хъюлчай тIий,
Гьалмахщаргу лирчIуна,
ДачIул дав-давлун кIанай
Ттупал къув-аьс ливчуна.