Августрал махъра-махъсса алхIат кьини ДР-лул Миллатирттал политикалул министерствалул зузалт, Республикалул БакIчи Рамазан АьбдуллатIиповлул тавакъюрайну, гьуртту хьунни юбилейрал хьунийн Дарбантлив дурсса хъуннасса субботникрай.

З. АьбдурахIманова
Ва кьини цалва идаралул пишакартуращал шагьрулий марцI-чапалшиврул давурттив дуллай, хъинну чялишсса гьурттушинна дурунни министр Татьяна Гамалейлгу. Вайннал пухпусурдацIа марцI бунни Дарбантуллал ца яла агьамсса Салманнул цIанийсса кIичIиравалу. Субботникравух мукунма гьуртту хьунни «Поддержка курса Главы РД» ДРОО-лул активистал, «Матери России» РОО ВОД-рал, «Я – помощник Президента» сакиншиннарал, щалва Аьрасатнал халкьуннал фронтрал вакилтал ва шагьрулул халкь.
Дуллалисса даврил агьамшиврия буслай, Татьяна Гамалейл кIицI лавгунни, Дарбантуллал юбилей ца дагъусттанлувтурансса байран дакъассагу, щалва билаятран хъуннасса ва бусравсса мяъна дусса шадлугъ душиву.
«Жущава ва агьамсса иширайнсса хIадуршиннаравух гьуртту хьун бюхъаву жула чулуха жущава бан шайсса кумагну чIалай бур. Укун цачIусса, цинявннан аьмсса давуртталгу жула укунмагу цаннал ца бувгьусса миллатру цачIун буллалиссар, ца кулпатраву куннасса нахIу-хIалимшиву хIасул дуллалиссар», — увкунни министрнал.