Дарбантуллал 2 000 шинал юбилейрал лагрулуву жулла республикалий дуван тIий бур чIярусса культуралул давуртту, шадлугъру, концертру. Миннувасса цану хъанай дур Дагъусттаннал халкьуннал аслийсса культуралул ва канил касмурдал фестиваль «Традиция».

Му фестиваль хьунтIиссар Дарбант шагьрулул юбилей дуллалисса сентябрьданул 19-мур кьини, Дарбант шагьрулул хъунмайданнив.
Фестивальданий Дагъус­ттаннал халкьуннал аслийсса культура, багьу-бизу ккаккан буван тIий бур 14 миллатрал майдандалийну. Хьун тIий дур халкьуннал канил пишардал выставкарду, халкьуннал культура ккаккан дуван тIий бур творчествалул коллективирдал, цивппалусса балайчитурал, музыкантътурал.
Халкьуннал канил пишардал усттартурал ккаккан дувантIиссар цалла давурттив, бувантIиссар мастер-классру. Ва иширавух гьуртту хьун, цалва бюхъу-гьунар ххалбуван хьунтIиссар ччиманаща. Хъамаллуран ва тамашачитуран дуллантIиссар хъуни дакъасса бахшишру.
Ва кьини, личIи-личIисса чIунну дургьуну, кIюрххил ссят 11-нния дайдирхьуну, хьунтIиссар фольклорданул фестиваль «Цамаури», пандуристурал конкурс «Звучи, пандур!», миллатрал балайлул фестиваль «Моя песня – Моя Родина – Моя Россия». Махъ хьунтIисса флеш-мобраву гьуртту хьунтIиссар Аьрасатнал Федерациялул субъектирдал вакилтал.
Дарбантуллал шагьрулул бюхттулсса юбилейрал лагрулуву Дагъусттан Респуб­ликалул Культуралул министерствалул ва Республикалул Халкьуннал творчествалул къатлул дувантIисса ярг-яргсса давуртту, щаллу буван ччи­сса пикрирду цаймигу чIявур. Миннувасса цаннийн бувну, байрандалул хьунийн Дарбантливсса Тархъаншиврул майдан (площадь Свободы) чIюлу бан тIий бур ранг-рангсса краскардал – дагъусттаннал миллатрал бартбисулул рангирдал, цил лагругу дикIантIисса 1 500 кв.м.. Ва пикри иширайну щаллу бувантIиссар Жамаллул цIанийсса Дагъусттаннал художествалул училищалул студентътурал.