Апрель зурул 26-нний «Дагестан» РИА-лул редакциялий ДР-лул жагьилтурал министр Камил Саидовлул пресс-конференция хьунни. Министрнал бувсунни чIал къавхьуну хьунтIисса форумирттая ва жагьилтурал сиптарду дузрайн ду­ккан дан кумагрансса грантирдая.

– ХIакьинусса кьини щалагу билаятрай дачин дурну бур жагьилтуран хас дурсса личIи-личIисса мероприятияртту. Цинявннан ххуйну кIулссар уттинин буллай бивкIсса хъунисса даражалул форумру: «Территория смыслов», «Таврида» ва щалагу Аьрасатнал даражалий­сса «Машук». ЦIанасса ппур­ттуву Калининград шагьрулий най буссар жура-журасса медиапроектирдахун багьсса жагьилтурансса «Шум» тIисса лавайсса даражалул форум. Форумирттайнсса аьрзри кьамул буллай байбихьлахьиссар июнь зуруй. Форумирттай гьуртту хьуншиврул аьркинссар, ччянива аьрзригу буллуну, багьайсса куццуй хIадур хьун, – увкунни Камил Саидовлул.

Министрнал мукунма кIицI лавгунни форумирттай гьуртту хъанахъисса жагьилтурахь ххишаласса кIулшивуртту дулаврил курсру буккинсса, итххявхсса студентътуращал опыт кIи-бачIинсса, цала проектру, пикрирду дузрайн буккан бансса сант душиву.
– Жагьилтурансса форумирттал дуссар цала-цала направленияртту. Мунийн бувну, вайннаща бюхълай бур цала дакIнил ларсъсса направление язи дугьан. Яла-яла, бюхълай бур грантру ласун ва цала сиптарду дузрайн дуккан дуван. Ларгсса шиналсса хIасиллайн бувну 81 инсан ххув хьуссар форумрал проектирдаву, – увкунни министрнал.
ДакIнийн бутанну, «Росмолодежьрал» чулухасса форумрал грантирдал конкурсрайнсса аьрзри кьамул баврил чIун сайки къуртал шавай душиву. Ва форумрал хIакъираву Жагьилтурал министерствалул хIадур дурну дуссар 14 -35 шиннардил жагьилтуран социал-проектрал давриву гьуртту хьун лахьхьин буллалисса цаппара модуллу. Май зурул 5-нийн бияннин буллусса аьрзри ххал бигьинтIиссар Дагъусттаннайн гъинтнил дайдихьулий бучIантIисса федерал центрданул жагьилтурал политикалул делегациялул.
Камил Саидовлул мукунма кIицI лавгунни форумирттай гьуртту хъанахъисса жагьилтурал сияхI ялу-ялун хъунна хъанай душиву.
– «Росмолодежьрал» чулухасса грантирдал къулайшивугу итадаркьусса арцу тIайланна ххув хьусса конкурсантнан дулайшивруву дур. Мунийн бувну, жагьилтураща бюхълай бур цала сиптарду, социал проектру, мероприятиярду ва бизнес дузрайн дуккан дан. Жу хIадурссару проектирдавух гьуртту хъана­хъисса жагьилтуран министерствалул чулухасса чIарав бацIаву дан. ХIукуматрал мурадгу итххявхсса жагьилтурал сиптарду дузрайн дуккан давур, – увкунни Камил Саидовлул.
Гьашинусса «Росмолодежьрал» конкурсраву хьхьичIунсса кIанттурду бувгьуминнаву ур кIия дагъусттанлув.

Камил Саидовлул кIицI лавгунни жула республикалий буллалисса «Каспий» жагьилтурал форум округрал даражалийн лавхъшиву. Ва форум регионнаясса жагьилтурал дянив машгьур шавринсса ца савав хьунни махъсса ппурттуву республикалийн чIявусса туристътал занай бушиву. Мунийн бувну, чIявусса бур форумрайн багьан ччисса жагьилталгу.
Министрнал бувсунни форумирттай гьуртту хъанахъисса цинявппагу жагьилтал итххявхсса ва дуккавриву хьхьичIун ливчу­сса бушиву.
Пресс-конференциялий Камил Саидовлул мукунма бувсунни Жагьилтурал министерствалул дачин дурсса цаймигу давурттая. Бувсунни мукунма гьашинусса «Бессмертный полк» акциялул даву хIасул давриягу.