Вай гьантрай Ххюлусмав хьунни шяраваллил агьалинащалсса хьунабакьаву. Ми­кку ихтилат бия жагьилтал экстремизмалия ва терроризмалия буруччаврийн багьайсса.

Махъ бакъа, жагьилтуращал терроризмалия ва экстремизмалия мюхчан хьун лахьхьин буллалисса давуртту дуллан цукссагу бигьа­ссар, яла му балаллущал таланнияр. Му мурадрай дан ккаккан дурну дур жагьилтураву радикал ишру ялун личин къабитансса давуртту; жагьилтураву, миллатрах, диндалух ва социал ахIвалданух къабурувгун, цайми инсантурачIансса ссавур, куннан кув бувчIаву тарбия даву; жагьилтурал оьннасса чIун мюнпатну ишла дуллалаву.
КьюлтIсса иш бакъар чIявусса жагьилтал личIи-личIисса радикал организациярттавун багьлай бушиву, хъунмурчIин, цалла оьнна­сса чIун дакIнингу, цIуллу-сагъшиврунгу мюнпатну гьан къадуллалаврийну. ПаччахIлугъран багьлай бур шяраваллавусса клубру, магьирлугърал къатри ва цаймигу социал идарартту чялишну зузи баврих къулагъас хъун дан. Багьлай бур жагьилтал спортрахун бичин.
Хьунабакьаврий ихтилатру бунни райондалул админист­рациялучIасса террорданийн къаршисса комиссиялул члентурал ва Аьрасатнал МВД-лул «Лакский» МО-лул зузалтрал. Миннал балжину бувсунни Дагъусттаннай терроризм ппив хъанахъаврил ялувсса тагьардания, обществалуву мунийн къарши бацIан ляхълахъисса чаранная. ВичIи дирхьуми цивппагу бия ва темалия чIявусса кIул бан ччай, суаллу буллай, хIала-гьурттуну.
Зулайхат Тахакьаева