Нанисса шинал Аьрасатнал муххал ххуллурдай 149 ДТП хьуну дур, муххал ххуллул переездрайх наниний дуруччин аьркинсса ххуллул низам къадурурччусса шупIиртал сававну. Ми иширттаву 151 инсаннан зарал бивну бур (2014 ш. — 133). Миннава 33 инсан оьрмулуцIа хьуну ур.

Июнь зурул 18-нний ссят 17.38 мин. хьусса чIумал Белгородуллал областьрай, Ржава – Прохоровка перегондалул 624-мур километралий дежурный зузала акъасса переездрай кьай духхай машина («Вольво») щуну бур Белгородрая Курскалийн заназисса №6228 электропоезд­райн.
Ва ишираву поездрал хьхьичIми шанма вагон ччех бивкIун, чIаравмур ххуллугу зия бувну бур. Ца вагон кIурабавну бур. Электропоездрал 16 пассажирнан ва локомотиврал бригадалувасса инсантуран зарал хьуну бур.
Мукунма зарал хьуну бур 150 метралул лахъишиврийсса ххуллун. Лирну дур поездру заназаврил график. БацIан бувну бур 7 пассажиртурал ва 8 шагьрулучIан гъанну заназисса поездру. «Аьрасатнал муххал ххуллурду» ОАО-лун бивсса зарал аьмну 47,5 миллиондалийн лахълай бур.
Июль зурул 31-нний муххал ххуллул переездрай 644-мур Прохоровка – Белихино перегондалул Курскалия Белгородрайнсса ххуллул 644-мур километралий пассажиртал бувцуну Москавлия Белгородрайн нанисса поезд №1 щуну бур КАМАЗ-райн. Ва ишираву рельсирдая ччех бивкIун бур электровоз ва 5 вагон. Зарал хьуну бур 29 инсаннан. Зия хьуну, бакьин бан багьлай бур 400 метралийхсса ххуллу.
Дахьра вай кIирагу ДТП сававну «Аьрасатнал муххал ххуллурду» ОАО-лун июнь-июль зурдардий 120 миллиондалия ливчусса зарал бивну бур.
Шин дайдирхьуния шихунмай август зуруйн бияннинсса чIумуву МахIачкъалаллал региондалийсса переездирттай 7 ДТП хьуну дур (хьхьичIмур шинал – 6 ДТП). Ми иширттаву зарал бивну бур 6 инсаннан, оьрмулуцIа хьуну ур 2 инсан. Аьмну Ухссавнил Ккавкказуллал муххал ххуллул переездирттай хьусса ДТП-ттал 27% МахIачкъалаллал региондалул переездирттай хьусса ДТП-тту дур.
Цинярдагу ДТП-тту, гьашинумигу, ларгсса шиналмигу, хьуну дур ххуллул низам къадурур­ччусса, переездирттай къадагъа дуллалисса сигнализациялух ва ххуллул лишаннах къулагъас къадурсса шупIиртал сававну. Ми переездрайх най бивкIун бур поезд биявайсса чIумал.
Щалвагу Ухссавнил Ккав­кказнаву яла-яла Дагъусттаннай оьккину дур переездирттайх наниний ххуллул низам дуру­ччаврил тагьар. Мунияту жула аьрщарайх нанисса поездирттан хъуннасса нигьачIаву дур.
Август зурул 1-нния байбивхьуну, сентябрь зуруйн бияннин МахIачкъалаллал кIанттул управлениялул буллалиссар муххал ххуллул переездирттай мюхчаншиву дузал даврил месячник «Внимание переезд!».

ХIурмат бусса шупIиртал!
ДакIний битияра, цукунчIав къабучIиссар ккаккан къабув­сса кIанттурдай муххал ххуллул переездрайн буклан. Ххуллул низам къадурурччуну, зу зулагу, лагма-ялттуналгу бакIрайн бала буцин бюхъайссар.
Переездирттайсса ДТП-тту хъунмурчIин хъанай дур цалва машинарттай аьрххилийн бувксса инсантал сававну, миннал баччибакъашиврийн, ссавур дакъашиврийн ва машина бачин баврил опыт бакъашиврийн бувну. Хъиннура оьккисса тагьар дур дежурный акъасса переездирттай. Ми переездирттачIан гъан хьусса чIумал шупIиртурал къадагъа дуллалисса светофорданух къулагъас дуллай бакъар. Миннал кьаст лахIлай бур гъанну нанисса поездрал хьхьичIух буккан.
ПереездрачIан гъан хъана­хъисса чIумал личIлулну бикIан аьркинссар.
Къадагъа дуллалисса светофор лархъун духьурча, шлагбаум ларкьуну духьурча ягу поезд гъан хъанай чIалай бухьурча, бацIан бан аьркинссар машина.
ДакIний битияра! Поезд га цIана бацIан бан къашайссар. Машинистнал мугьлат бакъа бацIан бувсса чIумалгума поезд 1000 метралийх гьан бюхъай­ссар.
Зулагу, цайминналгу оьрмулун нигьачIаву къадуллай, ххуллу булара поездран.
Поезд лавгун махъгу мукIру шияра чIарахсса ххуллийх переездрал чулиннай нанисса цамур цичIар дакъашиврий.
Мюхчан бувара зулассагу, цайминналссагу оьрмурду.