Ларгсса нюжмардий МахIачкъалалий шагьрулул администрациялул хъунаманал бигарду чIумуйну биттур буллалисса Муса Мусаевлул Аьрасатнал Президентнал Ухссавнил Ккавкказнавусса вакилнал аппаратрал социал-экономикалул политикалул департаментрал хъунама
Вячеслав Песковлущал дунни ХIамидовлул (59) ва Ю. Акаевлул цIардайсса (15) кучардай дуллалисса къатрал хIакъиравусса совещание.

И. Саидова
Совещаниялий ялагу гьуртту хьунни АьФ-лул Президентнал СКФО-райсса вакилнал аппаратрал Дагъусттаннайсса хъунама Василий Колесников, МахIачкъала шагьрулул администрациялул хъунаманал хъиривчу МахIаммадамин ХIажиев, Ленинский райондалул администрациялул хъунама ХIажияв Дарбишев, Шагьрулул архитектуралул ва строительствалул управлениялул хъунама МахIаммадрасул Гитинов, Респуб­ликалул прокурорнал хъиривчу Заур Тарханов, МахIачкъала шагьрулул прокурор МахIаммад МахIаммадов ва ДР-лул Минстройрал вакилтал.
ДакIнийн бутанну, лекьавайсса ва дух хьусса къатрава агьали бизан буллалисса программа иширайну дузрайн ду­ккан даву мурадрай, ялув кIицI лавгсса адресирттай дуллай буссия шагьрулул агьали бизан бувансса къатри. ХIамидовлул ва Акаевлул кучардай дуллалисса къатрал чIахху-чIарах ялапар хъанахъисса инсантурал градостроительствалуцIун бавхIусса нормарду биттур къабуллай бур тIисса аьрзри буллалаврийн бувну, къатри дуллалаву дуссия дацIан дурну.
ЦIанасса чIумалгу вай къат­рал строительство дуссар дацIан дурну.
Вячеслав Песковлул тIалав бунни строительствалуцIун бавхIусса нормарду биттур къабаврил хIакъиравусса бувчIин бавурттив дуван ва цIакусса программа ккаккан дурсса чIумуй биттур даву.
Совещаниялий ихтилатру бунни Архитектуралул ва шагьрулул строительствалул хъунама МахIаммадрасул Гитиновлул ва ДР-лул Минстройрал вакилтурал.
Шикку ххалбигьлагьисса масъалалул хIакъираву Муса Мусаевлул бувсунни цалвамур пикри: «Шагьрулул администрациялул каялувчитурал буссар так ца хIучча, мугу хIукуматрал ккаккан дурсса тIалавшинна биттур давур. Вай къатри дуллалийни итадаркьуну диркIсса диялдакъашивуртту чIяруми низамрайн дурцуну дур. Респуб­ликалул строительствалул ва архитектуралул министрну усса чIумалгу, ми строительствардан кьиматгу бивщуну, аьлтту хьусса диялдакъашивуртту чарабакъа духлаган дувансса амрурду був­ссар. Жу хIасул бувссия, «Выездная лаборатория» тIисса, шагьрулул строительстварду ххалдигьлагьисса пишакартал занази бувсса проект. На шагьрулул каялувчи хIисаврай цинявппагу агьалинал тIалавшиннарду би­ттур дуллан аьркинссара. Агана прокуратуралул строительствалуву итадаркьусса диялдакъашивурттал хIакъиравусса ахир хIукму буварчанни ми диялдакъашивуртту духлаган дуван аьркинсса. Мунияту цаппарасса инсантуран ччай бакъарча куну, бизан баврил хIакъиравусса муниципал программа дацIан дувансса ихтияр жухь дакъа­ссар».
Заур Тархановлул кIицI лавгунни вай къатри шагьрулул строительствалул нормардайн бувну дуллай бушиву ва къатри дуллалавриву диялдакъашивуртту хьунадакьирчан, прокуратуралул ххуллу-чаранну лякъинтIишиву.
«ЧIал къавхьуну, зурул мутталий, жу балжину баян бувантIиссар ми къатри дуллалаврил хIакъиравусса хIукму», — увкунни Заур Тархановлул.
Шагьрулул архитектуралул хъунаманал маслихIат ккавккунни, подрядчиктурал къатри дуллалинийсса диялдакъашивуртту ххалдаву мурадрай, гьарца зуруй экспертиза тIайла буккаван.