[dropcap]М[/dropcap]арт зурул 24-нний республикалий хIасиллу дунни «Большие вызовы» тIисса щалагу Аьрасатнал элмийсса технологиярттал проектирдал конкурсрал региондалулмур ятIапрал.
Региондалул финалданийн дурккун дия 38 проект. Миннува 2 проект дур ЦIуссалакрал райондалул дуклаки оьрчIал хIадур дурсса.
Конкурсрал гьурттучитуран сакин дан багьлай бия 13 журасса проект. Жюрилул кьимат бишлай, хIисавравун ларсунни даврил методика ва ахир-мурад бартбивгьусса куц. Конкурсрал хIасиллайн бувну, личIи унни 15 призер ва хьхьичIунсса кIантту бувгьусса 5 дуклаки оьрчI.
Призертурал сияхIрай ур Гьамиящиял 2-мур школалул дуклаки оьрчI Шамил Билалов.
ХьхьичIунсса кIанттурду бувгьусса дуклаки оьрчIру ва призертал гьуртту хьунтIиссар конкурсрал финалданий.
Гьуртту хьунтIиссар финалданий
[dropcap]М[/dropcap]арт зурул 25-нний итххявхсса оьрчIансса Республикалул лицей-интернатраву хьунни дуклаки оьрчIал дянивсса дунияллул халкьуннал «Живая классика» т1исса конкурсрал региондалулмур ятIап.
«Живая классика» му Аьрасатнал оьрчIансса литературалул ца агьамсса проектну хъанахъиссар.
Конкурсрай гьуртту хьунни ЦIуссалакрал райондалийсса ЦIуссаккуллал 2-мур школалул дуклаки душ Квасова София. Конкурсрал школарттайсса ва районнайсса ятIапирттай хьхьичIунсса кIанттурду бувгьусса дуклаки оьрчIру язи бувгьуну бия региондалулмур ятIапрай гьуртту хьун.
Региондалий жюрилул язи бувгьусса 3 финалист гьуртту хьунтIиссар «Артек» лагерьданий хьунтIисса конкурсрал финалданий.
Конкурсрал финалданий гьуртту хьунтIиссар София Квасовагу.
Шиккува кIицI лаган, республикалий «Живая классика» конкурс нанисса 10 шинал мутталий ЦIуссалакрал райондалия София хъанай бур цалчин ва конкурсрай хьхьичIунсса кIану бувгьусса дуклаки душ.
ЧIа учинну Софиян финалданувугу тIайлабацIу.
