![](https://ilchi.info/wp-content/uploads/2023/03/photo_5472013945897338111_y-e1678098005221.jpg)
Билаятрал мюхчаншиву дуруччавривугу, цайми-цайми иширттавугу, агьалинал багьу-бизулувугу аьркин хъанахъимур щаллу дуллай, М. ХIажиевлул цIанийсса заводрай, совет заманнай кунма, арамтуращал ца ххуттай зузисса хъами чIявур хIакьинугу, вайннавух – лакгу.
Хьурттал шяравасса Мусаева Султанат МахIаммадлул душ, МахIачкъалаллал 33-мур школагу къуртал бувну, 1976-ку шинал, оьрмулул 18 шинаву бувкIун бур заводрайн. Дяхтта зий, хьхьувай дуклай, ЯтIул дипломрай бувккуну бур Механикалул техникум . Ва бур инженер-нормировщик ва экономист. Заводрайн бувкIния шийнмай 45 шинай ца кIанай – 18-мур цехраву зий бур.
ЗахIматшивурттая цIувххукун, ва тIий бур: «ХьхьичIва 4 азарунния ливчусса инсантал зий бия, цIана цикссагу чансса бур. Цукуннугу, жуща бювхъунни завод ябуван, бюкьан къабитан. ЧIявуми махIатталгума хъанан бикIай, завод ттигу «сагъну» бусса кIул хьувкун. ЗахIматшивуртту чан дакъар, ми дух дувару. ЧIярусса мюрш-кьюршсса заказру дикIай агьалинан ичIура аьркин шайсса, мукунна – цивппа заллусса организациярттаясса, идарарттаясса. ВаницIун дархIусса мюрш-кьюршсса расчетру, хIакъи-хIисаврттугу дуллан багьай», – буслай бур ва.
Кьукуннал шяравассса Лариса Хавчаева МахIаммадлул душ, инженер-технолог заводрай зий бур 1980-ку шиная шийнмай. Механикалул техникумгу бувккуну бувкIун бур ва шиккун. Ванил даву дархIуну дур аьралий ва граждан щинал жамирдан аьркинмур итадакьаврицIун. Ванил дуллай бур ва давриву чара бакъа аьркинсса чертежру, процессру сакин буллай, аьркинсса инструментру, станокру язи бугьлай бур. Лариса зий бивкIун бур заводрал личIи-личIисса цехирдаву, махъсса ацIнияхъайсса шиннардий зий бур 18-мур цехраву.
![](https://ilchi.info/wp-content/uploads/2023/03/-Аьлиева-e1678098072949.jpg)
Татар миллатраясса Аьлиева Диляфрюс Курмаевна бур лакрал жалин. Ванил лажиндарай чан къашайсса тIий бур пиш, чани, вибувцIунува бур оьрмулухсса ва даврихсса гъирарал. Буттал арс Аьлиев Мирзаханннущал цачIу ванил 45 шинайсса оьрму бувтун бур. КIул хьуну бур вай 1961-ку шинал Аштарханнай, му чIумал Мирзахан, техникумгу бувккуну, шиккун практикалийн ивкIун ур. Ташу бувну бур 1966-ку шинал. Вара шинал бувххун бур жагьилсса душ М. ХIажиевлул. 1987-ку шиная шийнмай ва зий бур хъунама технологнал отделданий инженер-технологну. ХIакьинугу шиннардих къабурувгун, Диляфруслул зузавугу, кIулшивурттугу, аькьилшивугу тIалавну дур шикку. Завод ванил хIисав бувай цилва кIилчинсса къатлун, 56 шинай архIал зузими – цилва гъанчунан. Ванил лас, аьпа биву, Мирзахангу зий ивкIун ур заводрай, цехрал начальникнугу, цайми-цайми давурттайгу. Вай кIиягу заводрал ветерантал хъанай бур. Заводрайсса даврия тархъансса чIумал ванин ххирар аьрщараха зун. Ванивугу духьунссар ванил жагьилшиврул, зирангшиврул кьюлтIшиву.
Къуруллал шяравасса МахIаммадаьлиева Жарият Сулайманнул душ зий бур заводрал здравпунктрай хъунмур медсестрану. Бувну бур Щурагь, кIиккува школагу, ЯтIул дипломрайнну медициналул училищегу бувккуну, кулпатрал хьуну, МахIачкъалалив бивзун бур. Ванил лас Шарип махъсса 8-хъул шиннардий Лаккуй, Къурлав, ялапар хъанай ур, шяраваллил хозяйствалухагу зий. Жариятгу Лаккуйгу, шагьрулийгу бур. Ва заводрай Жарият зий бур 2014-ку шиная шинмай. Ваниннин цилва пишалий зий бивкIун бур Щурагь. Производствалий чIиви-хъунсса апатI хьусса чIумал, цалчинсса кумаг буллай, жаваблувшиву ххину зий бур Жарият.
![](https://ilchi.info/wp-content/uploads/2023/03/-Аьбдулмугидова-e1678098106451.jpg)
Карашатусса АьбдулмухIидова Мунира Батталовна, МахIачкъала шагьрулул 39-мур школалий дянивсса даражалул кIулшиву ласайхтува бувкIун бур ва заводрай зун инструментирттал кладовщицану. ХIакьинусса кьинигу зий бур шиккува – 18-мур цехраву, зузалтран аьркинсса кьай-кьуйлулсса буллай, сайки 40 шинай.
«ХьхьичIва, кIира сменалий зий, хъинну чIявусса инсантал бикIайссия заводрай, цIана, хьхьичIмуних бурувгун, хъинну чанну бур. Зий, занай буру, ца хъунмасса кулпат кунма. Ттун вай цинявппагу ттулва уссурвал, ттулва гъанчу кунма ххирассар, вайннал хIурмат ттучIа, ттулсса вайнначIа буссар», – тIий бур Мунира.
Ванил бурж, ва чIиви бакъасса цехрал даву дакъацIанну, зузалт ялугьлагьи къабанну, цила чIумуй аьркинмунил, пишакартал зузи ярагъуннил лащу-щаллу бавур.
Гьарца зузала гьантлун цимийлагу учIайссар шиккун инструментирттал хъирив. Канихьхьун буллумур ва махъунмай бувкIмур инструментрал ялувсса чичругу дувайссар чара бакъа, булуннин цал багьайсса даражалийн бувцуну, зузи бувну, махъунмай лавсун бувкIукунгу, марцI бувну, цила-цила кIанайн бувкьун. Гьарца инструмент цила чIумал лавсун гьан аьркинссар лабораториялувунгу, ххал бигьаву дуван. Лабораториялувусса хасъсса пишакартурал Аьрали продукция дувайни ишла байми инструментру ххал буван тIурча, хIатта цайми шагьрурдаясса пишакартал, комиссиярдугума бучIайсса бур.
Зузалал тIимуних вичIи дишин кIулсса, аьркинний кумаг бувайсса, чIарав ацIайсса, инсаншиву дусса, зузалтрая цIа дувангу, аьркинний, аьй дувангу кIулсса цала директор Аьбдулвагьаб Папалашевлуя рязину бур Мунира ва махъсса ваймигу зузалт.
Вава заводрай, 13-мур цехраву, хьхьичIва зий ивкIун ур ванил ппу, аьпа биву, Баттал МахIаммадовгу. ЦIана шикку, 2-мур цехраву, зий бур ванил душ Сабирагу, куявгу.
Буршиял шяравасса АхIмадова Каинат Ибрагьимлул душ бувну бур Азирбижаннай, ЗакIатIаллай. Тихва школагу бувккуну бур. Муниннингу Дагъусттаннайн чIявуну букIлай бивкIсса Каинатлул школа бувккуну махъ ларайсса кIулшивурттугу ларсун дур Дагъусттаннай. Инженер-механикнал язи бувгьуну, 1981-ку шиная тIайла хьуну зий бур шикку, лабораториялуву, хъунама метрологнал отделданий контролерну. Вай зий бур, заводрал цехирдаву итадакьлакьисса продукциялул лагрулул ялув бацIлай, хаснува обороналул заказру дусса чIумал.
Вава заводрай зий бур ванил ссу Написатгу.
Буршиял шяравасса Аьбдулвагьидова Шакират Лукьманнул душ, МахIачкъала шагьрулул 5-мур школагу къуртал бувну, Механикалул техникумгу, Пединститутгу бувккуну бур. Заводрайн бувкIун бур 1985-ку шинал. Муния махъа, заводрая лавгун, личIи-личIисса кIанттурдай зийгу бивкIун, махъунмай заводрайнма бувкIун бур ва. Ва бур контрольданул мастер, дуллалисса гьарцагу затрал ялув бавцIуну, га зат дурну къуртал хьуну махъ буллай бур паспорт ва гьан дуллай бур муштариначIан.
КIилчинмур ЦIувкIуллал шяравасса Дибирова Муъминат Нажмуттиннул душ, буттал шяраву школагу, яла Политехнический техникумравун къуртал бувну, 1978-ку шинал ва тIайла буклай бивкIун бур «Стекловолокно» заводрайн, душниннив цуппа практикалий бивкIсса М. ХIажиевлул заводрайн ччай бивкIун бур. Мукун бувкIун бур шикку зун, зий бур двигателлал чархру (катушкарду) кай-кай буллай, электрообмотчицану.
М
![](https://ilchi.info/wp-content/uploads/2023/03/-Анжела-e1678098151575.jpg)
ахIмудова Анжела Сулайманнул душнил хъунма хIал къавхьуну бур 18-мур цехрал кладовщицану зий. Нину, Карашрал шяравасса Магьият ва ппу Сулайман, шикку зий буну, оьрчIнийа шиккун букIлай, кIулсса, ккаклай бивкIсса завод бакъа бацIан къахьунссия тIий бур Анжела. ХьхьичIрасса чIунну дакIнийн дичлай, кIицI лаглай бур шанна сменалий зий бивкIшиву.
«Хъунма стаж бур куну, пахру буван къахьурчагу, ттун хъинну ххирар завод, шиккусса даву, – тIий бур ва.
Карашатусса МахIмудова Магьият ХIажинал душ заводрайн бувкIун бур 1976-ку шинал. Зий бивкIун бур 1996-ку шинайннин, яла, махъ, цуппа зузисса цех лавкьукун, зун бивкIун бур заводрал хъунна хIаятраву бивхьусса чIиви ттучандалий, зузалт чара бакъа аьркинмунил щаллу буллай. Заводрай зий ур ванил лас, цIахъюрдал миллатраясса Сулайман МахIмудовгу, душ Анжелагу.
М. ХIажиевлул цIунийсса заводрай зузисса цинявппа хъами-душварахь барча дуллай буру Хъаннил байран.
Вания тийнмайгу чIярусса шиннардий битаннав зу зунсса, занансса гъирарай, оьрмулия ххари-шадну.