Аьрасатнал тарихраву 2022 шин пашмансса хха чивчусса шин хьунни. Украиннавусса хасъсса аьралий операция байбивхьуну, тайннал къювугу жуламур кунна кьамул дурну, чувшиву аьлтту дуллалисса цикссагу чиваркI тIайла бувккунни нитти­хъал дакьаву дуручлан.
Февральданул 24-нний Ук­раи­ннайсса хасъсса аьралий операциялий Аьрасатнал Виричу НурмахIаммад ХIа­жима­хIаммадовлул виричушиврий жан дуллуну шин хьунтIий дур. АлхIаткьини буттал шяраву, Къянив, НурмахIаммадлул гьа­ттац1 тIутIал шалкри бихьлахьисса бат1аву хьунни.

Шикку гьурттушинна дунни Ккуллал райондалул администрациялул бакIчи Шамил Рамазановлул, идарарттал вакилтурал, гъан-маччанал, хъамаллурал, Къяннал школалул дуклаки оьрчIал ва цайминнал.
Махъ лахълай, райондалул администрациялул бакIчинал увкунни:
– НурмахIаммад дуккавривугу, оьрмулувугу хьхьичIун ливчусса ия. Гьарца ишираву мунал ккаккан дуллай ия зунттал чувнал хасият. Мукунсса хасиятгу тIабиаьтрал инсаннан дуллуну дикIай ягу дурагу къадикIай. Дуниял мукунсса дур, ца янил ляпI учиннин инсан акъа хьун бюхъайсса. Оьрмулул ва хьулданул дянив Виричунал кьадар кьамул бан бюхъавугу зунттал чувнал хасиятрал ца лишанну хъанай дур. НурмахIаммад жуна тачIав хъама- къаитантIиссар, ванал жан дуллуссар хIакьсса офицернал зумуну. Неонацистътурал гьужумраву ва талай ивкIссар къучагъну, ванан дурагу 25 шинъя, амма, жагьилсса оьрмулул шиннах къаурувгун, ванал ватандалул хьхьичIсса бурж цIанихну лавхъссар. Ва кIулцири ца зумату кунма тIий бур – душманнал хьхьичI ник къарищунтIиссия тачIавгу тIий.
Жу пахрулий буссару цIарал ххуттайсса гьарцагу аьраличуная. Ялугьлай буру ччясса чIумул мутталий Ххувшаврищал зана хьуннин.
Аьпалул митинграй махъру лавхъунни мукунма Нурма­хIаммадлул буттауссил, Къяннал шяраваллил бакIчи Малик ХIажимахIаммадовлул, Ккуллал райондалул имам МухIаммад-Маннар Бариевлул ва мукунма цайминнал.
БавтIцириннал ва хъамаллурал, аьпагу куну, дакIнийн увтунни Аьрасатнал тарихраву абадлий цIа кьариртсса Ватандалул виричусса арс.
Митинграл хъирив Къяннал школалул дуклаки оьрчIал аьралитурал аьпалун щаллу дунни Ватандалун, дяъвилул иширттан хас дурсса композицияртту.
P.S. ДакIнийн бутан, хъунама лейтенант НурмахIаммад ХIажимахIаммадов Украиннаву­сса хасъсса аьралий операциялий цала цува п1якь учин увссар лагма лавгсса неонацистътурацIун. Мартрал 3-нний 2022 шинал Аьрасатнал Президент В. Путиннул ХIукму кьамул був­ссар 25 шинал оьрмулувусса хъунама лейтенант НурмахIаммад ХIажимахIаммадовлун Аьрасатнал Виричунал цIа дулун.
«На лаккучура, дагъусттанлувра, чачанна, ингушра, оьрусра, татаринна, еврейра, мордвинна, осетинна» тIисса Аьрасатнал Президентнал махъругу ливчIссар тарихраву.