ЦIуминалийсса ЦIуссалакрал райондалийн даврил аьрххилий увкIунни Аьрасатнал экономикалул министрнал хъиривчу Сергей Назаров. ЦIуссалакрал аьрщарай ванал ххал бивгьунни «Развитие СКФО» тIисса паччахIлугърал программалул лагрулий ЦIуссалакрал, ЦIуссаккуллал, Аьхъардал ва ТIюхчардал шяраваллаву буллай бивкIсса оьрчIал багъру. Сергей Назаровлущал райондалийн бувкIун бия АьФ-лул минэкономразвитиялул, ДР-лул ХIукуматрал, ДР-лул Халкьуннал Мажлисрал ва ЦIуссалакрал райондалул администрациялул делегацияртту.
ЦIусса шинал дайдихьулий ЦIуссалакрал райондалий тIитIинссар 620 оьрчIансса кIантту бусса 4 оьрчIал багъ.
Сергей Назаров цалчин ивунни ЦIуссалакрал райондалийсса ЦIуссалакрал шяраву бувсса 140 оьрчIансса кIантту бусса «Улыбка» т1исса садикрайн.
«Мукьва цIусса садик цалархIал тIитIаврийн бувну, кьамул бантIиссар райондалий оьрчIал багъирдавунсса сияхIрай бавцIуну бивкIсса цинявппа оьрчIру ва хьунтIиссар 200 инсаннансса зузи кIантту. Гьаз хьунтIиссар оьрчIал школарттайн бачиннинсса кIулшивурттал даража», – увкунни Назаровлул.
ЦIусса оьрчIал багъирдаву бур музыкалул, спортрал ва компьютердал заллу. Цинявппагу группардаву дур оьрчIансса мебель. Бур мукунма уттизаманнул оборудованиялул дузал бувсса столовыйртту, санузеллу, ванныйрду, отопление.
ЦIуссалакрал райондалул кIулшивуртту дулаврил управлениялул хъунмур Светлана Къудаевал кIицI лавгунни садикирттаву бушиву шин ва дачIи хьусса оьрчIру кьамул бансса шартIру дусса яслилул группарду.
Делегациялул хъиривмур аьрххи хьунни ЦIуссаккуллал шяраву тIивтIусса «Непоседа» т1исса садикрайн. Шиву бур 250 оьрчIансса кIантту ва яслилулмур группа.
Къуртал давай бур хIаятравусса давуртту. Садикрал идара бур кIира зивулийсса.
Сергей Назаровлул мукунна ххал диргьунни 2023-ку шинал ЦIуссаккулату дайдирхьуну дуллантIисса ххуллурдал инфраструктурагу.
Объектру ххал бивгьуну махъ, ЦIуссалакрал райондалул бакIчи МахIаммад-ХIажи Айдиевлул бувсунни 370 оьрчIансса кIантту бусса 3 садик шинал ахирданийннин оьрчIру кьамул бан хIадурну бушиву ва 250 оьрчIансса кIантту бусса садик. 2023 шинал цалчинмур кварталданий бувну къуртал бансса пикрилий бушиву.
ЦIуссалакрал райондалий цIуну дурсса объектирдан лайкьсса кьимат бивщунни Сергей Назаровлул.
«Федерал бюджетрава ялун нанисса 2023-ку ва 2024-2025-ку шиннардийсса планнаву буссар ЦIуссалакрал ЦIуминалийсса ххуллурдал инфраструктуралул строительствалул давуртту дуллансса арцу ккаккан дурну», – увкунни ДР-лул ХIукуматрал лакрал миллат бизан баврил масъалартталсса буллалисса управлениялул хъунама ХIажи Султановлул.
