Ноябрьданул 23-нний Р. ХIамзатовлул цIанийсса Национал библиотекалий хьунни уттигъанну дунияллия лавгсса Дагъусттаннал халкьуннал шаэр Космина Исрапиловал аьпалул мажлис. Ва кьини ванин хьунтIиссия 61 шин. БатIаврил сиптачиталну ва сакиншинначиталну бия М. Илиясовал цIанийсса «Дараччи» фонд ва Р. ХIамзатовлул цIанийсса Национал библиотека.
![](https://ilchi.info/wp-content/uploads/2022/11/-Буттаева-e1669632146435.jpg)
14-мур школалул дуклаки душ (лакран ххуйну кIулсса Буттаева Марзият АхIмадовнал арснал душ)
БакIрайва Косминал оьрмулия ва творчествалия, Национал библиотекалул давурттаву ванил дуллай бивкIсса гьурттушиндарая бувсуна библиотекалул зузала ПатIимат Муртазялиевал. Мажлис бачин бувну бия философиялул элмурдал доктор, профессор Асият Буттаева.
Цилва ихтилатраву ванил кIицI лавгуна хIакьину залданувун бавтIун бушиву республикалул культуралуву биялсса бутIа бивхьусса инсан дакIнийн утан.
Гихунмай махъ лавхъсса «Дараччи» фондрал каялувчи Гульшан Хасаевал чIурчIав дуруна ноябрьданул 23-сса кьини мукунма дунияллийн бувкшиву «Дараччи» фондрал гьану бивзсса, цимигу шинай ваний усттарну каялувшиву дуллай бивкIсса, аьпа биву, Мариян Илиясовагу: «КIива «дараччинка» – ца мубараксса цIа дусса Мариян, вамургу – аьрщи ва ссав цачIун дуллалисса Космина.
Оьрмулуву бикIу, творчествалуву бикIу, Косминащал хIала-гьурттуну, дусну зий бивкIминнал Косминая учинмур къачанъя.
Ва журалул ихтилатру бувна Дагъусттаннал халкьуннал чичу Мирза Давыдовлул, Ккавкказуллал Чичултрал клубрал хъунмур, шаэр, публицист Миясат Муслимовал, ДГУ-лул Дагъусттаннал мазурдил кафедралул доцент Ххазина Аминовал, шаэр, «Илчи» кказитрал отделданул редактор ПатIимат Рамазановал, Шушиннал школалул лакку мазрал учительница Умамат Багъирчаевал, Дагъусттаннал халкьуннал шаэр, Национал библиотекалул зузала СабихIат МахIаммадовал ва м.ц..
![](https://ilchi.info/wp-content/uploads/2022/11/e7d0a114-028f-4d78-8a45-360f93d26d7f-e1669632090986.jpg)
Мажлисрай гьурттушинна дурунни шагьрулул 5-мур, 9-мур, 14-мур, 36-мур школарттал дуклаки оьрчIал. Аьпа биву, Сулайман Мусаевлул таржума бувсса сура щаллу бувна балайчи Жанна Кьурбановал. Космина бивкIусса чIумал ваниха цилла чирчусса назму дурккуна Бахттун Гъазиевал.
Махъру лавхъминнал гьарцаннал бия КосминацIун, ванил творчествалуцIун бавхIуну цанма-цанма асар хьусса кIанттурду.
Барчаллагьри ва мажлис бан дакIнийн багьминнан!