ЦIусса дуккаврил шин дайдихьлахьисса шадлугърал мажлис хьу­нни сентябрьданул 1-сса кьини Ккурккуллал школалийгу.

Школалул хIаятравун кIюр­ххила бавтIун бия учительтал, дуклаки оьрчIру, нину-ппу. Ляли­чIинува ххарину бия гьашину цалчин школалийн нанисса мюрщи оьрчIру.
Зунттал щархъавусса цинявппагу школардай кунма, дуклаки оьрчIру Ккурккуллал школалийгу чанну бия. Гьашину цалчинмур классравун лавгунни увагу шама оьрчI.

 

Школалул завуч Рукьижат Сулаймановал цIусса дуккаврил шинал мажлис тIитIлатIисса баян байхту, Аьрасатнал гимнрахун гьаз бунни ттугъ. Хъирив оьрчIругу, учительталгу барча буллалисса ихтилат бунни школалул директор Кьурбан Гъужиевлул.

Ванал кIицI лавгунни Ккурккуллал школа мудангу хьхьичIунсса, сий дусса школа бивкIшиву, дуклаки оьрчIру чанну бухьурчагу, школалул лайкьсса цIа дуруччин аьркиншиву. Цалчин школалийн бувкIминнан ванал чIа кунни кIулшивуртту ласаврил ххуллийсса цалчинсса шаттирду тIайлабацIусса хьуннав куну. Хъирив, 10-мур классрал дуклаки оьрчI Шарипхан Магьдиевлул кару дургьуну, цалчин школалийн бувкIминнал бивщунни цалчинсса гюнгутIи.

 

Ккурккуллал школалул оьрчI­ру ва учительтал байрандалущал барча бан увкIун ия Лакрал райондалул Социал иширттал управлениялул хъунама Рамазан Майрамов. Ванал буллунни цалчинмур классравун бувкIсса оьрчIан рюкзакру ва арцуйнусса бахшишру.