Вай гьантрай Дагъусттаннай хьунни «Герои. От поколения к поколению» тIисса цIанилусса автопробег.

Автопробег Ухссавнил чулуха Хасавюрт шагьрулия, Кьиблалул чулуха Белиджи поселокрая дайдирхьунни. Хасавюртраясса колонналул гьурттучитал аьрххилий букканнин бувкIунни Буттал кIанттул цIанийсса Хъун дяъвилул участник, Совет Союзрал Виричу, танкист Эльмурза Джумагуловлул гьайкалдануцI тIутIив дишин. Шичча вайннал аьрххи бия Къизилюртуллал райондалийсса Комсомольское тIисса шяравун. Шикку, Авгъан дяъвилул участник, Аьрасатнал Виричу Нухидин ХIажиевлул ватандалий, митинггу дурну, ванал гьайкалдануцI тIутIив дирхьунни.

Ссят 12.00. хьусса чIумал ав­то­пробеграл гьурттучи­тал був­кIунни Украиннал аьрщарай нанисса аьрали опе­рациялуву къучагъшиву ккаккан дурсса Аьра­сат­нал Виричу НурмахIаммад ХIажима­хIаммадов дуклай ивкI­сса МахIачкъалаллал 42-мур школалийн.Шикку хьунни Виричу дакI­нин утлатисса мажлис. Ихтилатру бунни Ветерантурал организациярдал, авгъан дяъвилул гьурттучитурал ва инвалидтурал Координационный советрал председатель МахIаммад Аьриповлул, НурмахIаммадлухь дарс дирхьусса учительтурал, ниттил Сапижатлул. Цинявппагу ихтилатчитурал кIицI лавгунни Дагъусттаннал чиваркIуннал кьянкьа-кьурчIишиву, ватан ххирашиву ва оьвчаву дунни дуклаки оьрчIайн жула вирттавран лайкьну оьрму бутлан.
Хъирив мажлисрал гьурттучитурал дирхьунни тIутIив школалул чIирайн лархъсса НурмахIаммад ХIажимахIаммадовлул улттуцI.

Автопробеграй кIивагу чулуха бувкми хьунабавкьунни Избербаш шагьрулий. Шичча вай гьантIиссар Аьрасатнал Виричу МахIаммад НурбахIандовлул ватандалийн – Сергокъалалив.
Аьмну автопробеграву гьуртту хьунни 32 машина ва 64 ветеран.

Сакиншинначитурал бусласимунийн бувну, мероприятиялул мурад бур, Буттал кIанттул цIанийсса Хъун дяъвилул, Авгъаннавусса дяъвилул иширттал вирттал, Ухссавнил Ккавкказнаву терроризмалул ва экстремизмалул иширттащал талай бивк1ми ва Украиннаву хасъсса аьрали операциялуву къучагъшиву ккаккан дурми эбратну бихьлай, дагъусттанлувтурал ирсирай нанисса къучагъшиву майшан чаву.