Байрандалул концерт

Т. Мурадовлул цIанийсса Дагъусттаннал паччахIлугърал филармониялул Гъинтнил эстрадалул майданнив хьунни байрандалул концерт ва Республикалул аьрали балайлул «С песней к Победе!» тIисса цIанилусса VI телевизион фестиваль-конкурсрал финал. Вай хIадур дурну дия Республикалул Культуралул министерствалул ва «Дагестан-концерт» ГБУ-лул.
Шадлугърайн бувкIун бия ДР-лул ХIукуматрал председательнал хъиривчу Муслим Телякавов, республикалул министерстварттал ва ведомстварттал каялувчитал, Хъун дяъвилул ветерантал.

Вихассар жул балайрду!

Республикалул Культуралул министерствалул ва Халкьуннал творчествалул къатлул сакин дурну, Яруссаннал театрданул хьхьичIсса майданнив хьуна Республикалул «Тебе, Победа, посвящается!» тIисса цIанилусса фестиваль.
Ваний гьуртту хьуна республикалул муниципал сакиншиннардиясса паччахIлугърал, ду­ккаврил ва цайнува цивппа хьусса творчествалул коллективру. Байрандалул концерт дайдирхьуна Дагъусттаннал паччахIлугърал филармониялул солист Вайсул Жалиловлул Расул ХIамзатовлул «Кьурукьру» балайлийну.

Ветераннал хIаятравун концертращал

Ххувшаврил кьини Хъун дяъвилул ветеран Кьурбанов Кьурбан ялапар хъанахъисса къатрал хIаятравун концертращал бувкIуна Дагъусттаннал паччахIлугърал опералул ва балетрал театрданул артистътал. Ветеран барча уван бувкIуна Рес­публикалул БакIчи Сергей Меликов ва МахIачкъала шагьрулул мэр Салман Дадаев.
БавтIминнал хьхьичI махъ лахълай, Сергей Меликовлул увкуна:
– Мяйжаннугу, хIакьинусса музыка, балайрду зущал цавай къатраву ялапар хъанахъисса ветераннал савлугъранни. Жунна Бюхттулсса Ххувшаву пиш-каш дурсса инсантурал хьхьичI ник ришлашиссара, – куну.
Театрданул артистътурал щаллу бувна дяъвилул шиннардил балайрду.

Къумукьнал театр – ветерантуран

Ва кьини Къумукьнал театрданул хьхьичIсса майданнивгу хьунни байрандалун хасъсса концерт. Театрданул артистътурал ва «Поющие сердца» ансамбльданул щаллу бувна дяъвилул шиннардил балайрду, мукунма ватандалухасса къумукь мазрайсса балайрду. Концертрай гьуртту хьуминнавух бия республикалий цIа дурксса балайчитал Бурлият Эльмурзаева, Рукьият ХIамзатова ва цаймигу, мукунма шагьрулул ОьрчIал музыкалул 1-мур школагу.

Ххувшаврин хасъсса суратру

Республикалул Культуралул министерствалул хьхьичI хьуна М. Жамаллул цIанийсса Да­гъусттаннал художествалул училищалул студентътурал ва преподавательтурал, мукунма шагьрулул оьрчIал искусствардал школардал арт-пленэр.
Ва кьини, оьрмулул га яла чIивиманая тIайла хьуну, хъунаманайн ияннин, гьарцагу художник ия буттахъал, ттатта­хъал дурсса виричушивурттан, цинявнналвагу хIарачатрайну, захIматрайну ларсъсса Ххувшаврин хасъсса суратру дихьлай.

Ссихьрал театргу – Ххувшаврин

Гьарца шинал кунма, гьашинугу, «Театральная неотложка» проектрал лагрулий, Дагъус­ттаннал паччахIлугърал ссихьрал театрданул коллективгу гьуртту хьуна Ххувшаврил кьинилул шадлугъирттавух. Театрданул хьхьичIсса майданнив вайннал ккаккан дурна «Мы этой памяти верны» цIанилусса музыкалул ва театрданул программа.
Театрданул артистътурал вичIидирхьуминнал дакIурдивун дюхханну дурккуна классиктурал дяъвилия ва ванил вирттаврая чирчусса назмурду, увкуна дяъвилул шиннардил балайрду, ккаккан дурна театрданул, музыкалул ва шеърилугърал зарисовкартту.
Театрданул артистътурал хъирив сахIналийн бувккуна «Креатив» цIанилусса литературалул клубрал гьурттучитал ва шагьрулул оьрчIал искусствардал 6-мур школа.