АрвахIкьини, апрельданул 20-нний, «Мирмол» сетевой изданиялул залдануву «Кавказ» тIисса Дагъусттаннал поисковый кьюкьлул каялувчи Хайбулла Умаров хьунаавкьунни журналистътуращал. Ванал бувсунни Буттал кIанттул цIанийсса Хъунмасса дяъвилул чIумал, 1942-ку шинал, дуртун диркIсса самолетрал парчри лявкъушиву Къизилюртуллал райондалийсса Языковка тIисса шяраву. Ванащал бувкIун бия самолетрал парчри аьрщарава буккан буллай бивкIсса поисковый суккушиндарал оьрчIругу.
КIицI лаган, ххал бигьавуртту най диркIссар «Горячее небо Кавказа» тIисса регионнал дянивсса проект дузал дуллалисса давурттавух «Вахта памяти» акциялул лагрулий. Поисковиктураща бювхъуну бур 1942-ку шинал дуртун диркIсса Су-2 самолетрал парчри, лявкъуну, аьрщарава буккан бан. ЦIанасса чIумал пишакартурал кIул буллай бур самолетрал модель.
Поисковый кьюкьлул каялувчинал бусласимунийн бувну, ва кIанттурдай самолет дикIан бюхъайшиву вайннан кIул хьуну бур шиччавасса оьрмулул бугьарасса инсантурая. Миннахь цIухху-бусу бувну, поисковиктурал кIул бувну бур самолет дагьсса кIану. Ккавкминнал бувсмунийн бувну, ххалбигьавуртту дан хIукму хьуну бур. Нанисса шинал январь зурул 1-нний, мах кIул дайсса техникалул кумаграйну, лявкъуну бур самолетрал парчри. Мунияр махъ «Кавказ», «Малгобек», «Курган» поисковый кьюкьрал хIарачатрайну сакин дурну дур экспедиция. Аьмну ва давриву гьуртту хьуну ур 20-ксса инсан.
– Дагъусттаннай гьаваллаву хьусса талатавриву дуртун дур самолет. Ваний бур, дагьну махъ пIякь увкуну, ччувччусса кIанттурду. Та чIумалсса инсантурал бусласимунийн бувну, самолет лерххун най диркIун дур заданиялий Ингушетиянал чулухуннай. Хасавюртуллал ялувсса ссавний ва хьунадаркьуну дур кIира «Мессершмитт» аьрали самолетирттащал. Гужру архIалсса бакъасса талатавриву жула бомбардировщик дуртун дур душманнал. Ва иширал бара хьусса колхозрал председательнал бувсун бур цана Хасавюртуллал райондалий парашютрай ххявхсса летчик ккавкшиву. Самолет цурда Къизилюртуллал райондалул чулухуннай лерхшиву. Шикку лявкъунни самолетрал парчригу. ЦIанасса чIумал самолетрал парчри марцI буллалисса давуртту най дур. Двигательданул номер кIул хьурча, кIул хьунтIиссар летчик цу ивкIссарив ва мунал бакIрачIан ци бувкIссарив, – тIий ур Умаров
Хайбулла Умаровлул бусласимунийн бувну, Хасавюртуллал райондалул школа бувккун бур летчикнал цIа абад дансса сипталущал. Ванал цIа школалун дулунсса ва ванал аьпалун сквер бансса пикри бур. Амма летчик цу ивкIссарив кIул хьунсса-къахьунсса бувчIинссар цинярда давуртту дурну махъ.
Умаровлул кIицI лавгунни цала кьюкьлул хIарачат бантIишиву самолетрал республикалул цания ца музейраву лайкьсса кIану бугьан. Ва ишираву цанма кумаг бантIишиву АьФ-лул ПаччахIлугърал Думалул депутат Сайгидпаша Умахановлул. Мукунма ванал бувсунни Дагъусттаннал ссавний талатавуртту най диркIсса кIанттурдай ттиния тихуннайгу ххалбигьавуртту дуллантIишиву.
