![](https://ilchi.info/wp-content/uploads/2022/04/capshima_mizit.jpg)
БувкIунни зурдардиву яла ххуймур ва ххирамур барз. Ва зуруй ляличIинува хIарачат буллан бикIару жува бунагьмуния, оьккимуния архну бацIан, гьарца учайсса мукъулгу, ласайсса шаттиралгу ялув цал ххишалану пикри буван, хъинсса давуртту чIярусса дуван. Ва барз шайссаксса мюнпат буну гьан бавривусса цаппарасса маслихIатругу бучIину лякъинхьуви тIиссару.
Дувара зуруйсса давурттал план
Барз – му, 300 бакъача, 30 гьанттар, мунияту ва зуруй хъиннура чIярусса, биттур дуван къабюхъансса давуртту зула бакIрайн маласару, янил ляпI учиннин Рамазан барзгу лавгун, дуван къархьумуния зува пашман къахъананшиврул.
![](https://ilchi.info/wp-content/uploads/2022/04/ulluchara_beten.jpg)
Дуваймур пахру-ххаралунсса мадулларду
Дуваймур дити чансса дикIан, чаннугу, багьайсса даражалий дурсса, ккаккиялун, чIюлушиндаран, пахру-ххаралун дурсса дакъача, дакIнийхтуну, Аллагь рязи увансса ниятрай дурсса. Думунил кьадру буну, бумунийн щукру бувну, марцI дуккан дувара дакIру ва пикрирду. Зулла чIун, бюхъавай, харж мадулларди соцсетирдан ва телевизорданун.
Хъамамабитари инсаннал яла чIявуми бунагьру мазрайну байшиву, мабулларду аьркин бакъасса ихтилатру, ми буллалийнивагу мабацIару. Гьан бувара ва барз чиримур, мюнпатмур дуллай, диндалиясса луттирду ккалай.
Авадан дуллалира кIулшивуртту
Чара бакъами чакурдицIун суннатмигу буллай, ялунсса цIу-цIусса дуаьртту ккалай, лахьлай, шайссаксса хъуннасса чIун гьан дувара исламрал кIулшивуртту авадан дуллай. Буллалисса чакурдил дянив лялукъияра паракьатшиврий зувалу щябикIансса 10 минутI. Ва чIумуйгу пикри бувара зура дуллалимунил, хъанахъимунил, гихуннай дулланмунил ялув.
![](https://ilchi.info/wp-content/uploads/2022/04/ulluchara_mizit_dron.jpg)
Жура дурмурди
жущалла личIайсса
Ва зуруй шайссаксса чIярусса хъин-хъинсса давуртту дувара. Дувара щалва зуруй зущара дуван бюхъантIисса чирилул давурттал сияхI, зулва хIалданух, кашилух бурувгун (чIаххувсса ттучандалий инсантурайх уква бачIинсса ччатI, цIу кьабивтун, зума итадакьин зучIанма хъамалу гъан-маччанайн, чIахху-чIарахнайн, дустурайн оьвкуну, зула чIаххуврайсса, гъан-маччанавусса ахIвал-хIал кIюласса кулпатирттан, ятинсса оьрчIан, ургала акъа ливчIминнан кумаг бувну, къашай-шайминнал ялун бивну ва м.ц.).
ОьрчIацIунсса даву
ЧIивиниява оьрчIру жулла диндалия, жулла байранная хавар буну, вай ххирану тарбия хъананшиврул, ва зуруй хаснува буллалира оьрчIащал исламраясса ихтилатру. Кумагран интернетгу ишла дурну, хIадур дувара оьрчIал ва зурул мутталий гьарца кьини биттур дуллансса давурттал сияхI. Масалдаран, Аллагьнал цIардащалсса, дуаьрттащалсса, вай дакIних лахьхьиншиврулсса карточкарду дурну, оьрчIахь диндалун хасъсса сурат дишин бувну.
Яла ххуймургу,
ххирамургу зат ччавур
Зува чак буллай буруча, зума дугьлай буруча куну, ми къадуллалиминнах ваца ливну лавгсса инсантурах кунма мабуругларди. Хъамамабитари цимурца Аллагьнаяту нанисса бушиву, гьарца лавсъсса шаттирахлу гьарманал жавабгу цалла дулунтIишиву Хъунасса Заннал хьхьичI. ХIакьсса бусурманчу чак къабуллалиманах, зума къадугьлагьиманах, ва дащуй ихьлай, сситтулну къауругантIиссарча, ссавурданий ургантIиссар.
Дин-чак дуллалисса инсаннаву дикIан бюхъайсса яла ххуймургу, ххирамургу зат – ччавур, сситтулгу, дащуй бихьлахьаврилгу хьхьичI баруну дарцIусса.