Мартрал 17-нний, оьрмулул 75 шинаву, хар-хавар бакъа, аьпалул хьунни ттун ссу кунма ххирасса ласнал ссу, дус Гулиса. Ва буссия кIива жяматрал дянив (СунбатIуллал ва Ккуллал) хъунма хьусса инсан.

Гулиса ялапар хъанай буссия Ккулув. Жу, чара бакъа, гьантлун кIийлва цанничIан цаннил оьвчайссия – кIюрххил ва хьхьувай. Гулисал, ванияр 25 шинал хьхьичIва ласгу ивкIуну, 7 оьрчI цилвалу ччаннай бацIан бувссар.
Гъинттул чIумал на, аьпа биву, ттула ласнащал, Закирдущал, Шахьував бувкIсса чIумал, Гулиса Ккулату бучIайва жу ккаккан. Шахьував буссаксса гьантрай, шяраваллил хъаннищалгу хIала бувххун, цуппа кIулну хъунма хIал къавхьунангу Гулиса ххира шайва, дакIний личIайва. Тти ва гъинттул жу кIивагу архIал гьанну тIий бу­ссияв Шахьував гьант­ри бан. Къанясивну лявкъунни…
Ххишала бакъа кьувтIунни Гулиса жуятува личIи хьусса кьурчIисса хавар. Жижара буллай бура ванил оьрчIахь, душваврахь, уссур-ссуннахь, махъсса гъан-маччанахь, ванин ххирасса чIаххуврахь. Цув алжаннул ххари баннав, гьав нурданул дуцIиннав. Махъ ливчIминнал оьр­мурдай барачат бишиннав.
* * *
СунбатIлив лявхъусса
Ккуллал Гулиса
Ттул хьхьичIунсса дусгу,
ласналгу ссуя.
Кьинилун кIийлва ттун
вил чIу баяйва,
Ва бявкъу хавардив къабаян ххива.
Тти на щихь буслава
хаварду-махъру,
ДакIнил бутIа хьусса
ттул ссу, Гулисай?
Лажинни, ци бувкIри
бакIрачIан, ттул ссу,
Хъиншиврул цIа дурксса
ттул дус, Гулисай?!
Вихь ихтилат бувни
на рахIат шайвав,
ДакIгу аьчух дурккун,
бигьалагайвав.
Вил хъяхъаврил чIу бур
вичIахух бишлай,
На аьсивгу буллай, аьтIигу буллай.
Ина алжаннавун буцин, вил хьунин
Закир, Роза, Руслан
хьхьичIун букканссар.
На цукун буссарив,
хъамакъабивтун,
Ина миннахь буси,
ттул ссу, Гулисай.
Вил зузалал кару
гьаттавух дишин
Цуксса захIмат хьурвав
оьрчIан-душвавран.
Дахьра дачIи шинъя вил
уссу лавгун,
Хъамакъабитайсса
ттул ссу, Гулисай.

Оьмариевхъал агьулданул цIания Субарижат
ш. Каспийск